Lunglei HPC scheme thar hawng

Lunglei HPC vice chairman Lawmawma Tochhawng, MLA chuan nimin khan Lungleia Sericulture pisaah HPC hmalakna thar HPC Eri Development Scheme a hawng.

Lawmawma Tochhawng chuan Covid-19 hripui avangin hun harsa tak hmachhawn a nih thu sawiin, “Ei leh bara intodelh leh kuthnathawktute tih hmasawn a pawimawh zia a lang chiang hle. HPC pawhin kuthnathawktute hmasawnna turin theihtawp a chhuah zel dawn a, kan kutkawih ngeia kan thar leh siam chhuah, project ṭha leh tlo kalpuia mipui tam zawkte tana eizawnna ngelnghet siam sak hi kan tum ber a ni,” a ti.

Scheme hnuaiah hian Lunglei district-a kut hnathawktu chhungkaw 10-te eri silkworm farming ti tura thlan a ni a, silkworm khawina-in (rearing house) sakna atan Rs.70,000 ṭheuh leh silkworm subsidy atan Rs 1,500 leh hmanraw dangte an dawng dawn a ni.