Lungleiah hriselna lama hmalakna sawiho

Lunglei District Task Force on Immunization (DTFI) chuan nimin khan an chairman Kulothungan A, bawrhsap hoin Intensified Mission Indradhanush (IMI) 4.0, Covid-19 vaccine leh National Deworming Day (NDD) chungchang an sawiho.

Ṭhutkhawma tarlan danin, IMI 4.0 second round-ah naupang vaccine pek tura chhût 114 chu pek kim an ni a, nu nau pai 12 hnenah vaccine pek tura chhût a nih laiin, mi 14 (116.67%) hnenah pek a ni. April 4, 2022 aṭangin khaw 38-a kum hnih hnuai lam nautê 128 leh nu nau pai 11 hnenah pek tura ruahman a ni bawk.

Lunglei district-ah Covid vaccine dose 2,12,011 pek a ni tawh a, kum 12-14 inkar mi 6,041 hnenah pek tura chhût a ni. August-October, 2021 chhungin kum 1-19 inkar mi 52,787 hnenah rúlhût hlo pek a ni a; April 20 (NDD)-ah sikul leh anganwadi centre bakah sikul leh anganwadi kal lo kum 1-19 inkarte hnenah rúlhût hlo pek tum a ni bawk.