Assam-in Mizoramah lei an dawh

Assam sorkar chuan Phainuam Buarchêp ramah an ram chin aṭangin Mizoram chin Lalnuntluanga leiletah April 2, Inrinni aṭang khan thîr lei (bailey bridge) an dawh.

Phainuam aṭanga Vanglaini thu dawn danin, Assam hian an ram aṭanga Mizoram chhunga lei dawh hna hi hun eng emaw chen an thawh hnuah, a bulṭhut (foundation) tur RCC hmanga an phun zawh hnuah hna an chawlhsan a ni. Hna an chawlhsan chhan chu Mizoram sorkar leh Assam sorkarin Phainuam Buarchep hmunah hmalak tawh loh ve ve tura an inbiak vang a ni.

Hetih lai hian, tun hnai khan lei dawhna tur hmanruate Assam sorkar chuan chhawpin, April 2, 2022 aṭang khan lei dawh hna an thawk ṭan leh a, nimin khan an thawh zawh hman rin a ni. Lei an dawh kaina hmun chu Lalnuntluanga leilet a ni a, ani hian dil pawh a nei a, mahse, Assam leh Mizoramin ramri-ah buaina an neih hnuah hma a la thei tawh lo a, Assam police-te'n inkulhna atan an hmang a ni.

Assam-in Mizoram chhunga lei an dawh kaina aṭanga metre 30 vela hlaah Mizoram police-in camp an nei a, Mizoram police-te hian Assam sorkarin lei an dawh lai chu harsatna an siamsak lo a, an dang lo.

Assam lamin Phainuam, Buarchep phaia lirthei luh theiha kawng siam ngei tumin hma an la a, Buarchep tlang chu metre 100 vêlin an la lai thleng lo. Tuna an lei dawh pawh hi an kawng laih nena inpawh tura an tih rin a ni.

Buarchep chhuah lamah tlang pahnih a awm a, pakhat zawk chu Buarchep tláng tih niin, Mizote hmunphiah chìnna hmun a ni. Tlang pakhat zawk chu Assam lam luah china ngaih a ni thung.

August 26, 2021 khan Phainuam khaw mite chuan Buarchep chhuah lamah JCB thâwm an hria a, thuneitute hrilh an nih hnuah drone hmanga endik a ni. Drone hmanga endik a nih hnuah Assam-in kawng an sial ngei tih finfiah a ni.

Drone hmanga endik a nih tûkah Mizoram police leh Phainuam khawtlang hruaitute chu a hmunah an kal a, JCB leh Hitachi pakhat hmangin lei an lo lai mek. Mizoram police leh khawtlang hruaitute an hmuh veleh hna thawktute chu an tlânchhia a ni. Police leh khawtlang hruaitute chuan police duty-na hmun tur an sa nghal a, duty an indah chhunzawm nghal.

Assam hian kawng hi eng emaw chen an lài tawh a, an ram lama awm tláng láwn chhuak tawhin, Mizoram chinah pawh eng emaw chen an lài tlang tawh. August 2021 hnu lamah erawh Assam hian kawng laih hna an thawk chhunzawm ta rih lo a ni.