Poshan Pakhwada Walkathon huaihawt
Women & Child Development (WCD) department chuan March 21 aṭanga April 4, 2022 thleng hian Poshan Pakhwada (Nutrition Forthnight) an hmang mek a, April 2, Inrinni zing khan Poshan Pakhwada Walkathon an huaihawt a, project hrang hrangah Poshan Pakhwada Walk huaihawt a ni bawk.
Poshan Pakhwada Walkathon thupui chu - ‘Identification and Celebration of Healthy Child’ tih leh 'Integration of Traditional and Modern Practices for Healthy India’ tih a ni a; WCD department-in state level, district level leh project level-ah an hmang a ni.
April 2, Inrinni zinga Poshan Pakhwada Walkathon-ah hian T Romana College-te nen thawkhoin, college zirlaite an tel a, WCD director Lallianpuii'n a vailiam. Lallianpuii chuan, ei tur hrisel pawimawhna hrang hrang sawiin, ṭhalaite chu ei tur ṭha chungchanga an mawhphurhnate hre chiang turin a chah.
Integrated Child Development Scheme (ICDS), Lawngtlai Project pawhin April 2 zing vek khan Poshan Pakhwada pualin kawngzawh, 'Poshan Walk' an huaihawt a; chawṭha, nu hnute tui, faina leh tui thianghlim in pawimawhnate an tlangaupui a ni.
Poshan Pakhwada hi March 21, 2022 khan WCD director Lallianpuii'n online hmangin a hawng a, chumi hnuah programme hrang hrang hman a ni. Youth Group Meeting neiin, YMA leh kohhrana ṭhalai pawlte nen hun an hmangho tawh a, YWCA nen thawkhoin cooking demonstration, traditional foods for mother & child tih thupuia hmangin nu, nausen leh naupangte tana Mizoram chhunga ei tur siam zirhona an buatsaih tawh a ni.
Distirct level leh project level-ah Anaemia (thisen tlakchhamna) chhungchang inzirtirna, anaemia endik rûnpui, anaemia laka invenna leh inenkawl dan, video clip competition, ei tur ṭha siam dan intihsiaknate an buatsaih tawh bawk.