Sorkarna siam turin kan inpeih -Duhoma

Zoram Peoples' Movement (ZPM) leader Lalduhoma, MLA chuan, an party chu an inlungrual thu sawiin, "Sorkarna siam turin kan inpeih a ni," a ti.

March 29 aṭanga April 1, 2022 chhunga Chalfilh bial khaw hrang hrang a tlawhnaah Lalduhoma chuan ZPM inrêlbàwlna ṭhat thu a sawi a, "ZPM hi kan inlungrual a, sorkarna siam tur hian kan inring tâwk a, kan inpeih bawk. Mipuite'n Congress ni lo, MNF ni lo sorkar din an duh tawh," tiin, Mizoram politics-ah harh tharna a thlen mek thu a sawi. 

ZPM Leader chuan, ZPM-ah mipuite’n rinna an nghat tawh nia sawiin, “ZPM chuan mipui a tibeidawng ve thiang lo. ZPM hi mipui tana din a ni a, a chhungah hian Zo fa zawng zawng kan leng vek a ni,” a ti.

Lalduhoma chuan, sem policy-in Mizoram leh mipui rilru a tichhia nia sawiin, “Mipuite hi thuawih tak kan ni, sorkarin ‘Chíng rawh u’ a tih chu thuawih takin kan chíng mai ṭhin,” a ti a; mahse, sorkarin thlai hralhna a ngaihtuah leh si loh avangin beidawnna khurah mipui an hnuh luh tâk ṭhin thu a sawi.

Mizoramin ram hruaitu eiru lo, ram leh hnam hmangaih leh a ngaihna hria a mamawh tih sawiin Lalduhoma chuan, “Kan ramah hian rorelna fel leh dik hi kan din a ngai tawh a ni,” a ti. ZPM thuchhuah tarlan danin, Lalduhoma hian Chalfilh bial khaw hrang hrang aṭangin ZPM party-ah mi 496 a lawm lut a ni.