END-in rakzu litre 22,460.070 man

Excise and Narcotics department (END) chuan kum 2022-ah March 31 thleng khan rakzu litre 22,460.070, heroin kg. 6.989 leh methamphetamine kg. 20.544 an man.

END hian January 1 aṭanga March 31 thleng khan zu bilh lai ṭín 36,878, zu siamna bungbel 618, dawidim kg. 112.950, sap zu ûm 3,989, beer ûm/can 4,951, Myanmar zu (BEDC) litre 957.300, ganja kg. 69.499, khuh damdawi phial 133, Alprazolam mûm 303 leh Tramadol mûm 310 an man bawk a; ruihhlo chi hrang hrang an man kaihhnawihah hian mi 1,085 leh lirthei 32 an man tel a ni.

END hian Lunglei Pukpui Branch YMA nen thawk dunin nimin zing dar 7:50 pawh khan Pukpui leh Zotlang inrina, Ramrikawnah heroin gram 234.940 (hawng 17) an man a; heroin-a inhnamhnawiha puh - Vanlaldiki (29) d/o Vanlaltlana, Bawngkawn Brigade Veng, Nathanaela (51) s/o Damsailova, Champhai Zion Veng leh Benjamin Lalramenga (28) s/o Hrangsawimawia, Bulfekzawl, Champhai district nia inchhalte an man. Heroin phurhna atana hman taxi MZ-04 A-4425 an hréng bawk.