'Ka ta a ni lo' tih ngai khawpa Hausak a hlauhawm - Lalsawta
Mizoram Pradesh Congress Committee (MPCC) chuan April 1-2, 2022 chhung khan Mamit district-a khaw hrang hrang an fang a; an president Lalsawta chuan, 'Ka ta a ni lo' tih ngai khawpa hausak a hlauhawm thu a sawi.
Lalsawta chuan, duhàmin awmzia a nei lo tih sawiin, "Sum ngah lutuk hi a buaithlak ṭhin. Kum 1995 khan Sukh Rama chu Telecom Minister a ni a, cheng nuai 366 lai a ina a lo dahṭhat, thuneitute'n an man sak khan 'Ka ta a ni lo' a ti chûl mai a ni. Kan pawisa neihte, 'Ka ta a ni lo' tih ngai khawpa hausa, sum lak luhna hriat si loh kan ni ang tih hi a hlauhawm tak zet. Mizoramah pawh Sukh Rama anga ka ta a ni lo tih ngai khawpa sum ngah kan awm ve mai thei," a ti.
Mihring nuna thil pawimawh tak chu rilrua danglam a nih thu sawiin Lalsawta chuan, "Mihring ngai reng hi nasa takin a insiam ṭhat theih a, nasa takin a danglam theih. Kan danglam thei ang tih hi ka ring tlat. Pathian zara kan sorkar a nih chuan a hma aia ṭha zawk tura insiam danglam thei miah lote chu kan mamawh dawn reng reng lo. MLA hlawh duh tâwk lote hi Congress-a an awm a ṭul lo," a ti a, mipui an retheih viau laia ram hruaitute hausak chu a zahthlak thu a sawi.
MPCC President chuan, March 29, 2022 zanah ṭhalai lehkhathiam tak takte nen an inkawm thu sawiin, “Ṭhalaite hian chhan chhuaktu an mamawhzia leh an tuihâlzia a chiang. Kan dinhmun hi eng pawh ni se, keini aia rethei leh chhâwng, chhan chhuah tur hi kan ngah tih i hre reng ang u. Pathian hian keini lo chu min thlang dawn lo nia kan hriatna hi kan thawhpui party dangte hi chuan an nei ve lo niin a lang,” a ti.
Hachhek bialtu MLA Lalrindika Ralte pawhin thu sawiin, mi dang sawisel loin inthlanah a tlin theih tih a sawi a, “Mi dang sawisel lo kei ngei pawh MLA-ah ka tling. Tunah hian min zui turin kan sáwm lo che u a, kan ram leh hnam siam ṭha turin i thawkho ang u, tiin ka sawm zawk che u a ni,” a ti a; kum 2023-a MLA inthlanah amah aia ṭha zawk thlan tur an hria a nih chuan a pawmpui thlap tur thu a bial mipuite a hrilh. MPCC thu chhuah tarlan danin, Lalsawta hian Congress party-ah mi 37 a lawm lut a ni.