CYMA-in ráltlân ṭanpuina tur an thawn ; Râltlân tan nuai 55.13 an dawng tawh

Central YMA chuan Myanmar aṭanga ráltlân, Vanhnuailiana Group YMA huam chhunga awmte ṭanpuina tur buhfai quintal 100 leh silpauline ip 10 chu April 2, Inrinni khan an thawn. YMA chuan ráltlânte ṭanpuina tur cheng nuai 55.13 an dawng tawh.

Ráltlânte ṭanpuina tur hi CYMA president R Lalngheta chuan Kulikawn aṭangin a vailiam a, CYMA-in ráltlânte tan theihtawp an chhuah zel tur thu a sawi.

Inkhawma tarlan danin, Myanmar buaina avanga harsatna tâwkte chhawmdawlna atan hian YMA-in sum a dawn tawh zawng zawng chu cheng nuai 55.13 a ni a, cheng nuai 44.22 hman tawh niin, hman loh cheng nuai 9.91 a la awm.

Central YMA chuan tun hnaia Khawmawi, Rihkhawdar leh Haimual khuaa inkahna avanga Mizoram lam lutte chhawmdawl ṭha a ti a, chhawmdawl dan tur a ruahman a ni. Ráltlânte chu Vanhnuailiana Group YMA huam chhungah an lut a, mi 5,000 dáwn an tling. YMA hruaitute’n an awmna tur buaipuiin, Zokhawthara kudam ruakah riahtir an ni a, ṭhenkhat chu ramri hrûl khaw dangah an riak bawk.

Ráltlânte ṭanpuina tur hi YMA Sub-Hqrs, Champhai hruaitute'n an lo dawng a, Vanhnuailiana Group YMA-te nen a ṭul angin an sem darh dawn a ni.

Central YMA chuan, sahimna zawnga Myanmar aṭanga Mizorama tlân lutte buaipuina kawnga sorkar, kohhran leh páwl hrang hrang, Mizoram chhung leh páwna mite leh Mizo mipui inpeknaah lawmthu an sawi a ni.