CS-in Thenzawl AH&Vety Farm a tlawh

Chief secretary Dr Renu Sharma chuan April 1, Zirtawpni khan Thenzawla AH&Vety Farm a tlawh a; Vety Farm-in hma a sawn theih nan leh hmalakna zau zawk a awm theih nan department secretary sawipui a tum thu a sawi.

Chief Secretary hian farm-a kêl vulh punna te, ran chaw chìnna te, Dilpui leh sorkar enkawl hmunte a tlawh a; OSD to CS H Zorintluanga, Serchhip bawrhsap Nazuk Kumar, Thenzawl SDO Pryank Kishore, Farm general manager Dr PC Lalsangzuala leh mi pawimawh dangte’n an ṭawiawm a ni.

Sorkar thuchhuah tarlan danin, kêl vulhna hi RIDF NABARD sum cheng nuai 600 sêngin kum 2019-ah bul ṭan a ni. Kelte chu Rajasthan leh Punjab aṭanga an lak luh a ni a, kel no piangte chu kel vulhtute hnenah vulh pun zel tura hralh ṭhin niin, April 1, 2022 thleng khan kel pa 49 leh kel nu 46 an hralh tawh. Tunah hian Farm-ah kel puitling Sirohi kel 15, Beetal kel 89 leh kel no 25 enkawl mek a ni.