NDA-ah tel mah ila party dang thuhnuaiah kan awm lo - Zorama
MNF president Zoramthanga chuan, MNF chu BJP kaihhruai National Democratic Alliance (NDA)-ah tel mah se, tu party thuhnuaiah mah an awm loh thu a sawi. Chief minister Zoramthanga hian he thu hi nimina Rajya Sabha MP inthlana vote a thlak zawha thuthar thehdarhtute zawhna chhángin a sawi.
Rajya Sabha-a MNF candidate chu thlan tlin a nih chuan a ṭhutna tur chu NDA lam a nih thu sawiin MNF President chuan, "Kan candidate hi thlan tlin a nih chuan theihtawpa Mizoram tan ṭan la turin kan ti. NDA-ah tel mah ila, issue base vek a ni. Mizoram tana ṭha lo tura thil lo kalah chuan tu party thuhnuaiah mah kan awm lo. Kan party-in inkaihhruaina kan neih angin, issue azirin kan 'yes' emaw, 'no' ang. Kan ṭhutna tur chu a tìra kan awmna pangngai NDA lam a ni," a ti.
Chief Minister chuan, Covid-19 chuan kawng tinréngah Mizoram a tiṭhanṭhu tih sawiin, "Sum leh pai leh sorkar activity-ah mi tiṭhanṭhu. Khawvel dang ang bawkin nasa taka beih a ngai. Mizoramah chuan sorkar, kohhran, tlawmngai pawl leh mipuite'n Covid-19 dona atan theihtawp an chhuah. Covid-19 hian sorkar tiṭhanṭhu mah se, a dona kawnga ti ṭha ber leh discipline ṭha ber tih tura Mizoram leh mipui kan awm thei hi a lawmawm hle," a ti a; Covid-19 chu Pathian puihna zarah sut tlang theih ngei a beisei thu a sawi.
Zoramthanga chuan, Mizoram sum leh pai zinga 90% vel chu sorkar laipui aṭanga lo kal a nih avangin sum dinhmun siamṭha turin hmalak vak ngaihna a awm lo tih a sawi a, "Chutih rualin, sum min pe turin central lam theihtawpin kan nawr ang a, kan nawr mek zel. Kan thawh chhuah ve tur 10% velah nasa takin ṭan kan la ang. Ram ṭha tak, a mihring chêng lêt thum châwm zo thei kan nei a, hemi hmang hian bul kan ṭan ṭhat chuan India ramah dingchhuak ṭha ber thei zinga mi kan ni," a ti.
SEDP chu ruahman angin kalpui chhunzawm a nih tur thu sawiin CM Zoramthanga chuan, "Raw chìn pawh kan chhunzawm a, tlemtêin kan kalpui thei chauh. Chawa intodelhna, horticulture leh kawng chi tinréngah a theih angin kan kalpui. Raw chíng turin in 200 chuangin lo an vât a, thlám an sà a, khur an cho a, an nghakhlel em em. A chî kan supply loh chuan an hnathawhin awmzia a nei dawn lo," a ti a; SEDP chu sum dinhmun harsat vang leh mipui activity khuahkhirh vangin duh angin an kalpui theih loh zawk thu a sawi a ni.
CM Zoramthanga thusawite
• NDA-ah tel mah ila, issue base vek a ni
• Kan canidate a tlin chuan a ṭhutna tur chu kan awmna pangngai NDA lam a ni
• Covid-19 in kawng tinrengah Mizoram a tiṭhanṭhu
• Covid-19 dona kawnga ti ṭha ber leh discipline ṭha ber tih turin kan awm
• Sum min pe turin central lam theihtawpin kan nawr ang
• Raw chi supply loh chuan a chíng turte hnathawhin awmzia a nei dawn lo