Minister-in kawngpui zauh tur a enfiah

Minister of state Dr K Beichhua chuan April 2, Inrinni khan a bial Siaha khawpuia kawngpui zím deuh lai zauh dan tur a enfiah. Beichhua chuan, PWD enkawltu Chief Minister-in Siaha khawpui leh Siaha-Titlao via Thosai kawngpui zauhna tur cheng nuai 1,000 pek a remtih thu a sawi.

Dr K Beichhua chuan, kawngpui zauh turah Siaha Circuit House pénga ama mimal ram chu an duh chin la hêk tur leh VC hruaitute nen ruahmanna lo siam turin PWD hotute a hrilh a, “Siaha khawpui kawngpui zauhna leh Siaha-Titlao via Thosai kawngpui zauhna atan PWD minister, chief minister Pu Zoramthanga chuan cheng vbc. 10 pek a remti a, a lawmawm tak zet a ni,” a ti.

Siaha khawpui tui lâkna, Titlao-a Renewal & Augmentation of Siaha Water Supply Scheme, kawlphetha hmanga Siaha khawpui châwm tur Titlao lui tui pump-na leh sawngbawlna hmun a tlawhnaah thu sawiin K Beichhua chuan, “Tun dinhmunah Titlao tui pump leh gravity-a tui lâkna tun hnaia hawn tak nen ṭangkawpin Siaha khawpui mamawh water supply a ṭha tawk a ni,” a ti a; Siaha khawpuiah a duh apiang tan tui connection pek chhuah theih a nih thu a sawi.

Siaha Meisatla - Circuit House via Siaha Bazar kawng zîm lai zauh tura ruahman chu km. 3.33-a thui a ni a, Assam Rifles kawng leh Siahahtla inkarah kawngpui zím lai zauh tur km. 1.6-a thui leh Meisatla-Titlao via Thosai kawngpui zauh tur km. 7-a thui a awm bawk.