KHAWTHLIR
KTP-in thisen pe
April 2, Inrinni khan KṬP branch paliin thisen unit 245 an pe. KṬP, Chhinga Veng Branch mipa 65 leh hmeichhia 14-in Civil Hospital, Aizawl tan unit 79 an pe a, Civil Hospital tan vêk Ramhlun Vengthlang Branch mipa 39 leh hmeichhia 10-in unit 49 an pe. Ramhlun North Branch-in ZMC tan unit 73 pein, petute mipa 63 leh hmeichhia 10 an ni a; Chhinga Vengthlang Branch-in Synod Hospital tan unit 44 pein, petute mipa 35 leh hmeichhia pakua an ni.
CS-in Serchhip tlawh
Chief secretary Dr Renu Sharma chuan April 2, Inrinni khan Serchhip district-a sorkar hotute nen DC conference hall-ah sorkar hmalaknate an sawiho a, Serchhip College, Serchhip District Hospital leh Agriculture hmunhmate a tlawh bawk. Chief Secretary chuan, fûr thlen hmaa inbuatsaih lâwk ngai chi-ah inpuahchah ṭha turin sorkar hotute a chah a ni.
Morgue van hlan
Aizawl South-II bialtu MLA Lalchhuanthanga chuan April 2, Inrinni khan a bial chhung ITI Veng Branch YMA hnenah morgue van leh a enkawl zuina tur Rs 30,000 a hlan. Lalchhuanthanga chuan, morgue van chu ITI Veng mipui tan a ṭangkai a rin thu sawiin, chhiatni ṭhatni atan ṭangkai taka an hman theih nan duhsakna a hlân a ni.
Kawngpui chanve khâr a ni dawn
SIPMIU chuan vawiin aṭangin Vaivakawn Traffic Point leh Vaivakawn (Hunthar péng) inkarah pipe lian an phûm dawn a, hei vang hian Traffic SP Rodingliana Chawngthu chuan kawngpui chanve khâr tur a nih thu a puang. Kawngpui hmangtute chu hna thawktute ngaichâng chunga lirthei khalh tur leh hnathawktute pawh an bungrua leh lirtheite mipui tana harsatna thlen tlem thei ang ber tura dah turin a hriattir bawk.
Sub-centre clinic
Lawngtlai East bialtu MLA H Biakzaua chuan April 2, Inrinni khan Lawngtlai Council Vengah Health sub-centre clinic thar a hawng a, uluk taka enkawl turin thawktute a chah. Sub-centre clinic-a thawk turte chu MLA fund aṭangin an hlawh tur ruahman a ni.
Ganja man
Vaivakawn Police Station-a police-te chuan April 2, Inrinni khan Vaivakawn Zohnuaiah Lalkapliana (39), Sanmiau, Tahan, Myanmar hnen aṭangin ganja kg. 5 an man. Ganja an man hi tualchhunga hralhna ang chuan Rs 3,50,000 man a ni.
First aid training
Khawzawl Hospital hotute chuan April 2, Inrinni khan Khawzawl police mi 30 tan 'First Aid Training cum Demonstration' an buatsaih. Khawzawl Hospital-a medical officer Dr Albert Lalhminghlua leh staff nurse PC Lalrinchhani ten thil pawimawh hrang hrang an zirtir a ni.