Covid active case tam lamah Mizoram 4-na

Nimin zing lam dinhmun angin, Mizoramah Covid-19 vei inenkawl lai mi 998 an awm a, India rama state 28 leh union territory pariat zingah hripui vei enkawl mek tamna ber palina a ni.

Mizoramah Covid-19 vei April 1, Zirtawpniah mi 112 leh April 2, Inrinniah mi 120 hmuh chhuah a ni a, positivity rate 10% aia sang ve ve a ni. Inrinni khan hripui vei dam tawh mi 178 leh nimin khan mi 53 chhuahtir an ni a, Covid-19 vangin mi pahnih an thi.

Covid-19 vei April 1-a hmuh chhuahte chu mipa 54 leh hmeichhia 58 an ni a; TrueNAT hmanga hmuh pakhat, RAT hmanga hmuh 110 leh FIA hmanga hmuh pakhat an ni. RT-PCR laboratory-a sample endik zingah positive an awm lo.

Covid positive April 2-a hmuh chhuah tharte chu mipa 53 leh hmeichhia 67 an ni a; RT-PCR hmanga hmuh pakhat, RAT hmanga hmuh 118 leh FIA hmanga hmuh pakhat an ni. TrueNAT hmanga sample endikte an negative vek.

IDSP record angin, Mizoramah Covid-19 vei 2,24,754 hmuh chhuah a ni tawh a, mipa 1,04,759 leh hmeichhia 1,19,995 an ni a, mipa aiin hmeichhia 15,236-in an tam zawk. Nimin tlai dar 5 thleng khan mi 2,23,123 (99.27%) chhuahtir an ni tawh a, mi 687 (0.31%) thi tawhin, enkawl mek mi 944 (0.42%) an awm.

Nimin zing lam dinhmun angin, Mizoramah Covid-19 vei inenkawl lai mi 998 an awm a, India rama state 28 leh union territory pariat zingah hripui vei enkawl mek tamna ber palina a ni a; Mizoram aia positive active case tamnate chu Kerala (mi 3,673), Karnataka (mi1,558) leh Assam (mi 1,349)-te a ni.

Hmar chhak state danga Covid-19 active case awm zat chu - Manipur-ah mi 31, Meghalaya leh Nagaland-ah 15 ve ve, Sikkim-ah pakua, Tripura-ah pali leh Arunachal Pradesh-ah mi pahnih an ni a; UT pali - Lakshadweep, Puducherry, Dadra and Nagar Haveli and Daman and Diu leh Andaman and Nicobar Islands-ahte active case an awm lo.