Siahatlaah total lockdown kalpui mek

Siaha district ma­gistrate Bhupesh Chau­dhary chuan, Disaster Management Act, 2005 Section 34 leh The Mizoram Epidemic Diseases (Covid-19) Regulations, 2020 (11)(1) tlawhchhan­in Siahaa veng pakhat, Siahatlaah total lockdown a puang a, nimin khan kalpui ṭan niin, July 14 thleng a awh ang.

Total lockdown puan chungchanga sorkar thuchhuah chuan, "Siahatla veng chhungah vanduaithlak takin Covid-19 sample test-a vawi hnih lai negative tawh chu fimkhur thil thua endik leh a nihin a positive hlauh mai a. Hei vang hian veng chhung mite leh mipui náwlpui himna leh natna inkai chhâwn awlsam tak laka kan invenna tur kawng zawn a ṭul ta a ni," a ti.

Total lockdown hian magistrate, Health department hnathawk, Police, Fire & Emergency Services, sorkar hnathawk, task force duty, thuthar lakhawmtute leh DC chhuah phalna a pekte a huam lo.

    Siahatla veng mi tu mahin an in an chhuahsan tur a ni lo.

    Veng chhungah lirthei tlan chhuah phal a ni lo.

    Dawr leh sumdawnna hmun khâr vek tur a ni.

    Hmun dang aṭanga Siaha pan leh Siaha aṭanga hmun dang pan lirthei, Siahatla paltlang turte chu Siahatla veng chhungah an ding tur a ni lo.

    Loh theih loha chhuakte'n Mizoram sorkarin inkhàrkhip kaihhruaina a siamte an zâwm vek tur a ni.