Covid-19 vei dam tawh Mi 139 an chhuah tawh

Mamit district mi Covid-19 hripui vei mi 20 zinga mi parukte chu an dam tawh avangin nimin chawhma dar 10:30 vel khan Mamita Covid Care Centre (CCC) aṭangin chhuahtir an ni a; heti hian Mizorama Covid-19 vei tawh mi 197 zinga mi 139 chu chhuahtir an ni tawh.

Mamit aṭanga thu dawn danin, Mamit CCC - SSA Girls Hostel aṭanga nimina chhuahtirte chu mipa pahnih leh hmeichhia pali an ni a; Mamit district-ah hian Covid-19 vei hmuh chhuah tawh mi 20 zinga 16 chu dam takin an chhuak tawh a, mi paliin an la vei mek. Hripui la vei mek mi pali zinga pathum chu CCC-ah an awm a, pakhat chu Dedicated Covid Health Centre (DCHC)-ah a awm thung.

Heti hian Mizoram pumah Covid-19 vei hmuh chhuah tawh zat chu mi 197 an ni a, chu'ng zinga 58 chuan la vei mekin, mi 139 erawh chu enkawl an nihna hmun aṭangin an chhuak tawh a; hriat theih chinah hripui vei, endik nawnnaa vei tawh lo (negative tawh) tih finfiah tawhte chu chhuahtir an ni vek tawh a ni.