KHAWTHLIR

TNT-ah enfiah
Mizoram State Legal Service Authority (MSLSA), Health department, National Institute of Locomotor Disabilities leh Social Welfare department hotutechuan nimin khan TNT, Muanna Vengah disability certifcate pek chhuahna atan medical examination an buatsaih. MSLSA member secretary Vanlalenmawia chuan, a hmuna kal chilha TNT-a awmte dinhmun enfiah chu an hlawkpui dawn tih sawiin, "A mamawh leh a nei tur dik takte'n disability certifcate an nei hi an chanvo a ni," a ti.

Champhaiah training
Kumina MLA inthlan neih zawh taka Champhai district-a vote chhiar tura ruat counting supervisor leh counting assistant-te pualin nimin khan Champhai DC conference hall-ah training buatsaih a ni. Champhai district-a Assembly constituency panga awmah polling station 137 a awm a, EVM-a vote tlate chhiarna tur dawhkan 27, postal ballot chhiarna panga leh VVPAT-a tlate chhiarna tur dawhkan panga a awm dawn a, vote tla zawng zawng chhiar zo turin round 27 a ngai dawn a ni.

UPC meeting
Mizoram UPC rorelna sang, Executive Committee vawi 56-na chu nimin khan chhunzawm a ni a, executive chairman Upa Lalnunmawia'n a kaihruai. Executive chairman leh general treasurer thar tur an thlang a, kum 2019 -20 chhunga executive chairman atan Upa Andrew Laldingliana leh general treasurer atan Rev. Gospelthanga an thlang. Mizoram UPC hian an inkhawmpui lian ber, General Assembly chu Assembly Center, Zonuamah tunkar Zirtawpni zan hian an ṭan dawn a ni.

AGEY zirchiang
Mizorama MzSRLM hnuaia Aajeevika Gramin Express Yojana (AGEY) kalpui dan zir chiang tura lo kal, Arunachal Pradesh SRLM team-te chuan Thingdawl RD Block leh Bilkhawthlir RD Block-te an tlawh a, AGEY motor dawng self help group (SHG) hrang hrangte an kâwm. Arunachal Pradesh SRLM team-te hi December 3-7 chhung Mizoramah an chám dawn a ni.