World Soil Day hman a ni

Nimin khan Mizoram hmun hrang hrangah Krishi Vigyan Kendra bultumin World Soil Day hman a ni.

World Soil Day hi Siahah chuan IPR conference hall-ah hman niin, MADC executive member (Agriculture & Horticulture) KH Beihlo-in a hmanpui a, KH Beihlo chuan, kut hnathawktute kalkhawmnate fuihna thu a sawi. Soil scientist Dr T Vanlalngurzauva'n hlawk zawka thlai thar chhuah theihna tura lei sâwngbâwl dan dik leh ṭha chungchang kut hnathawktute a zirtir a ni.

Kolasib-ah chuan World Soil Day hi KVK hmunah hman a ni a; KVK senior scientist Dr Michelle C Lallawmkimi chuan, lei chu mihringte tana siam a nih thu sawiin, "A tichhetu leh tichereutu chu mihringte tho kan ni a, leilung ṭha nei turin mahni hmazawnah ṭan lak ṭheuh a pawimawh," a ti.

DAO J Rothanga pawhin thu sawiin, "Leilung humhalh leh duat kawngah ṭan kan lak a ngai tak zet. Heng ni hman ṭhin hian vawi leh khatah hmasawnna thlen ṭeuh lo mah se, a tahtawlin hmasawnna hmuh tur a awm ṭhin," a ti a; World Soil Day chuan khawvel humhim leh enkawl chung­changah hmasawnna a thlen a beisei thu a a sawi.

Inkhawmah hian Hortoki, Kawnpui leh Serkhan aṭanga tel kut hnathawk mi 45 hnenah Soil Health Card sem a ni.

World Soil Day hi Khawzawlah pawh KVK Farmers Training Hall-ah hman a ni a, KVK senior scientist Vanlalhruaia Hnamte-in World Soil Day hman a nih chhan sawiin, "Mihring dam khawchhuahnan leilung chhe zel tur humhalh a pawimawh tak zet a ni," a ti.