CADC function tir reng duh lo

Chakma Autonomous District Council (CADC)-a MNF ṭhalaite chuan nimin khan CADC Secretariat kawtah CADC sorkara Congress party MDC-te BJP nena an thawhhona aṭanga an inhnuhdawh hnu pawha CADC sorkar a kal (function) reng an duh lohna an lantir.

Nimin vêk khan CADC-a MNF Legislature Party leader Rasik Mohan Chakma chuan District Council & Minority Affiars Secretary hnenah hlawh tur bak CADC atana sum pe tawh lo tura ngenna a thawn.

MNYF thuchhuah tarlan danin, kumin April thlaa CADC inthlanah Indian National Congress leh BJP ṭangkawpin sorkar inṭâwm an siam a, INC member-te chu October 29, 2018 khan an thawhhona aṭangin inhnûkdâwk a ni.

INC-te inhnuhdawh hnuah Mizoram MLA inthlan atan inbuatsaihna kalpui a nih tawh avangin Executive Committee thar din a harsa thei a; chutih lai chuan Shanti Jiban Chakma chu CEM angin a awm tho a, executive function zawng zawng, sum che vel thlengin a enkawl a ni.

MNF ṭhalaite chuan, a rang lama CADC executive function tihtawp leh sum che vel tihtawp an phût a, an thil phût tihhlawhtlin a nih loh chuan lungawi lohna lantir zel an tum thu an tarlang.

Hetih lai hian, Rasik Mohan Chakma chuan District Council & Minority Affairs Secretary hnenah INC MDC-te BJP nena an thawhhona aṭanga an inhnuhdawh tawh avangin, MNF Legislature Party chuan CADC atana hlawh bak pek chhuah loh an duh thu a thlen a, "Chutiang a nih loh chuan hmasawnna hna thawhna atana sum ruahman tam tak hi a ­chingpen ang tih kan hlau a ni," a ti.