Thu dik lo thehdarh vangin Lawngtlai DTF-in FIR thehlut

Nimin khan social media-ah thu dik lo thehdarh a nih avangin Lawngtlai DTF District Task Force chuan nimin vêk khan Lawngtlai Police Station-ah Lawngtlai SDO (Sadar) V Lalruatliana, incident commander hmingin FIR an thehlut.

Nimin khan social media-ah, 'Quarantine center, Lawngtlai aṭangin hri vei mi pahnih an tlân chhuak a, an kalna chin hriat a ni lo. Lawngtlai khawpui an buai hle. Thingfal khua kan fimkhur a ngai. Mikhual eng chi mah thlen loh a him. Tin, thil zuar pawhin mikhual hnena thil zawrh loh a him. I fimkhur ang u. - VLTF THINGFAL TLANGAU' tih thehdarh a ni.

Thu thehdarh chu thu dik lo a nih avangin Lawngtlai DTF chuan mipui tirálkhèl zawnga thu dik lo vawrh darhtu chu chhui chhuah an nih a, dan hmanga hrem an nih theih nan FIR an thehlut a ni. Social media-a thuthang dik lo chu hmuh a nih veleh district thuneitute'n Lawngtlai district-a quarantine centre-te an endik nghal a, quarantine centre leh Covid Care Centre-a khung hran lai tu mah chhuak lo an awm lo a, an kim vek tih an finfiah.

Lawngtlai DC Dr Andrew H Vanlaldika chuan, mipui tichiai leh tithlabár thei zawnga social media-a thu dik lo thehdarh a ni chu pawi a tih thu sawiin, Covid-19 kaihhnawih thu thehdarh kawngah fimkhur leh zual turin mipui a chah a, "Sorkar thupek zâwm loa thil tisualtute chu sorkarin dan behchhana hrem an ṭul a ni," a ti. Lawngtlai district-ah Covid-19 vei mi pali an awm mek a, an vaiin CCC-ah enkawl an ni.