Covid-19 vei dam leh tawhte Damdawi-in aṭangin an chhuak
June 18, Ningania Zoram Medical College (ZMC) Covid-19 Laboratory-a mi 814-te swab sample endik zingah Covid-19 hripui vei an awm lo. Covid-19 vei vanga State Referral Hospital (SRH)-a enkawl mi pariat chu hripui an vei tawh loh avangin nimin khan damdawi-in aṭangin an chhuak.
SRH-ZMC Covid-19 Bulletin-in a tarlan danin, June 18, Ningania swab sample 814 endikte chu Covid-19 lakah an fihlîm vek. Ningania endikte hi Lawngtlai district mi 87, Aizawl district mi 69, Saitual district mi 72, Champhai district mi 171, Serchhip district mi 89, Lunglei district mi 260, Khawzawl district mi 60 leh SRH-a awm mek mi paruk an ni a; mipa 384 leh hmeichhia 430 an ni.
ZMC laboratory-ah hian nimin khan ZMC, Aizawl, Sihphir, Champhai leh Serchhip aṭanga swab sample dawnte endik leh a ni a, vawiin zingah result hriat theih beisei a ni.
Hetih lai hian, Covid-19 hripui vei SRH-a enkawl zinga mi pariatte chu natna an vei tawh loh avangin nimin chawhnu lam khan damdawi-in aṭangin chhuahtir an ni. Mi pariatte hi Kolasib district mi paruk leh Aizawl district mi pahnih an ni. Heti hian Mizoramah Covid-19 vei mi 130 hmuh chhuah tawh zinga pakua chu an dam tawh a, mi 121-in an la vei mek.
SRH-ah hian hripui vei mi 39 an la awm mek a, mi 38 chu Isolation Ward-ah an awm laiin, pakhat erawh chu ICU-ah enkawl a ni. SRH-ZMC Bulletgn chuan, "ICU-a awm damloin hma a sâwn a, ward-a awm zingah harsatna nei an awm lo," a ti.
Nimin khan Covid-19 vei rinhlelh thilah mi pakhat chu SRH-ah dah luh thar a ni a; ani nen hian hripui vei ni lo mi (damlo) 11 enkawl mek an ni.