MISSTA-in ambulance pahnih sorkar an pe

Mizoram Secondary School Teachers’ Association (MISSTA) chuan an thawh khawm aṭangin ambulance pahnih an lei a, nimin khan Health & Family Welfare department hnenah an hlân.

Ambulance hlanna inkhawm hi Secreta­riat tualah hman a ni a; MISSTA hian ambulance chu Health minister Dr R Lalthang­liana hnenah an hlân a ni. Co­vid-19 do nan CM Relief Fund-ah Rs. 10,26,000 an thawh chu School Education minister Lalchhandama Ralte hnenah an pe nghal bawk.

Health Minister chuan, zirtirtute aṭanga sorkarin ambulance pasarih an dawng tawh tih sawiin, ropui a tih thu a sawi a, "CM kaihhruaina leh rua­hmanna ṭha tak hnuaiah sorkar hnathawkte leh mipui, kohhran leh tlawm­ngai pawlte lungrual taka hmelma kan hmachhawnho hi a ropuiin a thlamuanthlak hle a ni," a ti a; hripui lèn chin tur hriat a nih loh avangin mipuite an ṭan mar tlat zel a ṭul thu a sawi.

School Education Minister pawhin thu sawiin, zirtirtute inpekna chu chhuanawm a tih thu a sawi a; HSLC leh HSSLC exam chungchangah, ṭum eng emaw zat Covid-19 vangin hun sawn a nih thu sawiin, "Tunah sorkarin July 1-3 inkara exam turin ruahmanna a siam ta a. Exam hmachhawn tur zirlaite leh exam buaipuitu zawng zawngte'n ngai pawimawh se ka duh. CBSE leh ICSE exam an buatsaih tawh a, hei vang hian phai lama academic session ṭan hunah kan inpeih ve hman loh chuan zirlai tam takin kum an hloh phah thei dawn a ni," a ti.

MISSTA-in ambulance pa­hnih an pek hi Lunglei Civil Hospital leh Lawngtlai District Hospital-a hman tur a ni. Covid-19 dona atan hian MISSTA member-te chu kumin May thlaa an hlawh aṭangin 5% an thawh khawm a, chu chu Rs. 38,24,581 a ni. Ambulance pahnih lei nan hian Rs. 11,98,652 an hmang a, insurance leh registration fee an tifel nghal.

Mizoram Teachers’ Federation hnenah ambulance leina tur Rs. 6,00,000 an thawh a, CM Relief Fund-ah Rs. 10,26,000 an pek bakah, district 10-a District Task Force hnenah Rs. 1,00,000 ṭheuh an pe bawk.

MISSTA-ah hian member 1,003 an awm a; ambulance hlanna inkhawm hi MISSTA vice president Zorammawia’n a kaihruai a, MISSTA president Hmingchungnunga leh MTF president Rosangzuala Ralte te pawhin thu an sawi a ni.