Empanelment hlih laia damlote'n MR an bill thei dawn
Mimal leh kohhran damdawi-inte'n Mizoram State Health Care Scheme (MSHCS) an zawm loh vanga sorkarin a pawmpuina (empanelment) a hlihsak chhunga chu'ng damdawi-ina awm damlote inekawlna senso sorkar aṭanga hmuh lêt theih loh tura tih tawh ni mah se, hmuh lêt theih turin sorkarin thutlukna a siam.
Mizoram sorkar chuan mimal leh kohhran damdawi-in, MSHCS zawm thei lote chu December 4, 2019 aṭang khan empanelment a titawp a, MSHCS zawm an remtih hnuah, January 24, 2020 khan empanelment a tinung leh tawh thung. Empanelment tihtawp a nih hnua private hospital-a awm damlote chuan an inenkawlna senso sorkar
aṭangin an hmu thei lo a ni.
Hemi chungchangah hian Health department chuan nimin khan notification a chhuah a; sorkar hnathawk leh MSHCS zawmtu, sorkarin damdawi-in empanelment a tihtàwp chhung December 4, 2019 aṭanga January 23, 2020 inkara private hospital-a awm damlote'n an inenkawlna senso an bill leh theih dawn thu a tarlang.
Thuthar thehdarhtute zawhna chhangin Health minister Dr R Lalthangliana chuan, damdawi-in ṭhenkhat, empanelment tihtawp an ni chungin damlo tam tak an luh tho thu a sawi a, "Mipuite'n an tuar nasa a, an hmakhua ngaihtuah a ngai. Chuvangin, kan Chief Minister hnenah damlote inenkawlna senso bill tir leh phalsak turin ka thlen a, ani'n mipuite hmakhua ngaiin a lo remti a ni," a ti.
Health Minister chuan, mirethei zawkte'n mimal leh kohhran damdawi-in nena an thawhho loh an tuar ngawt chu ṭha an tih loh thu sawiin, "Mipui leh damdawi-inte hmakhua ngaiin thutlukna siam a ni," a ti a; damdawi-inte nen an inrem tawh a, rualkhai taka thil kalpui ṭha an tih thu a sawi.
Dr R Lalthangliana chuan, mimal leh kohhran damdawi-inte nena an thawkho thei chu lawmawm an tih thu sawiin, "Dan reng rengah pawh fuh tâwk lo a awm thei a, siamṭhat leh a ni fo. MSHCS-ah pawh dik tâwk lo leh fel tâwk lo a awm thei a, chu'ngte chu damdawi-in lam thuneitute nen enhoa siamṭhat zel a ni ang," a ti.
Mizorama mimal leh kohhran damdawi-inte inzawmkhawm pawl, NGHAM secretary Dr Vanlalsiama Chhangte chuan, sorkar thutluknaah an lawm tak zet thu Vanglaini a hrilh a; an intiam ang ngeia chak taka sorkarin hma a lak avangin sorkar chungah leh Health Minister chungah an lawm tak zet tih a sawi.
MSHCS leh NGHAM
• NGHAM-in December 2, 2019-ah thuchhuah an siam a, chhan hrang hrang avangin MSHCS an zawm theih loh thu an tarlang.
• Health & Family Welfare department-in December 4, 2019-a notification a chhuah a, MSHCS Society hnuaia government approved rate anga damlo an enkawl theih loh avangin MSHCS zawm thei lo private hospital-te chu empanelment hlihsak (suspend) a nih thu a tarlang.
• MSHCS zawm theih loh vang hian Mizoram sorkarin a tìrah chuan private hospital 18-te empanelment a hlihsak a, a hnuah private hospital ṭhenkhatin MSHCS an zawm leh avangin empanelment suspend-na chu sût leh a ni a, private hospital zinga MSHCS zawm thei ta lote chu damdawi-in 16 an ni.
• Health Minister ngenna chhángin NGHAM-te chuan January 24, 2019-ah MSHCS zawm an remti.