MNF chuan Mizoram hi mahni kea dintir theih kan tum - Zoramthanga
MNF party chuan nimin khan Hnam Runah mi thar lawm luh inkhawm an buatsaih a, a lawmluttu an president Zoramthanga chuan MNF party chuan Zoram mahni kea dintir theih an tum thu a sawi.
Zoramthanga chuan MNF chu inti lal lo a, theihtawpa intodelh ṭhang an nih thu sawiin, "Mi ring loa mahnia intodelh tum, independent pawh tum kan ni. Midanga innghat loa kal tùm tur a ni. Congress leh BJP chu Delhi-ah an innghat. Mahni inchawm tura ngaih kan ni a, min ṭanpuitu an awm chuan kan lawm. Zoram mahni kea din tir theih kan tum," a ti.
Zoramthanga chuan Congress party chu beih beih chi pawh an ni tawh lo nia sawiin, "An zâm lutuk ang tih a hlauhawm. Delhi lam en ila an dinhmun a chhe hle a, tihngaihna a awm tawh lo," a ti a, Mizoramah pawh Congress tan dinchhuah ngaihna a awm tawh loh thu a sawi.
MNF President chuan ZPM tan pawh hmana an ropuina, an thawm natna chu hmantlak a ni tawh lo nia sawiin, "Kum 2018-ah party ni lo, movement an inti a, unit din pawh ṭul an ti lo. A ṭhen phei chuan kohhran hi kan unit a ni mai an ti. Kalphung thar nen kan kal dawn an ti a, an khuangpui Vanglaini leh Zonet a ring thei ang berin an vua. Hre chiang lo tan chuan zui âwm tak an ni," a ti.
ZPM chuan zung an kaih thei lo nia sawiin MNF President chuan, "Kohhran support kan ni a, kan unit a ni mai, party kan ni lo, movement kan ni tia aupui a rem tawh lo. Kohhranin an remti tawh lo ang. Party dang ang thoin an kal tawh a, unit-te dinin, registration leh recognition-te an dil a ni," a ti a, ZPM chu an duh loh ṭhin duh lo thei loin an awm tawh niin a sawi.
MNF President chuan kum 2023 MLA inthlan lo awm turah an party chuan a tlem berah seat 30 an lâk a rin thu sawiin, "Kum 2023-ah hian sorkarna kan neih ngei ka ring. Congress chu under 5-ah an awm ka ring a, an tihsual chuan an artelukâwn thei. ZPM chu under 10 an ni hrim hrim ang," a ti.
Zoramthanga chuan MNF chu international war, internal war leh political war sutlanga ding chhuak an nih thu sawiin, "Pathianin hman tlakah min ngai a ni a, harsatna karah a hun takah min ṭanpui ṭhin. Kan fel lo leh tling lo chungin Pathian leh kan ram tan kan tih tlatna hi kan felnaah a ruat a ni," a ti a, MNF chu tui anga nghet lo ni lo, dingnghet tlat party an nih thu a sawi.
MNF President chuan Pathian ṭanpuinain an sorkar lehzel tur thu sawiin, "Malsawmna a in ṭan dawn chauh. Tum ropui tak neia kal kan ni. Covid-19, ASF, ramri buaina lian, raltlan, a harsa chi hlirin min rawn delh. Sum leh pai a harsa si. Heng su tur hian Pathianin min dah tlat a ni. Pathian ṭanpuinain damkhaw chhuakin, kan su chho zel," a ti.
Zoramthanga chuan a kaihhruai sorkar sawipawrna tur eptute'n an hmu ngang lo nia sawiin,"Kan hnathawh dan leh development kalpui danah Zoram mipui tan a ṭha em? tih lam aiin an hunlaia tribal certificate an pek Kamrula-te an buaipui em em a, Abu-a pawh buhfai supply tura an hman kha a ni a, keini'n ramri buai lai khan kan chhawr zui mai a ni," a ti a, politics-a inbeih dan hniam a tih thu a sawi.
MNF President hian an party-ah MZP hruaitu hlui pathum lawmlutin, an zingah president kal chhuak chiah B Vanlaltana a tel.
ZORAMTHANGA THUSAWI TLANGPUI
1) Kum 2023-ah Congress-in seat 5 aia tam an lak ka ring lo
2) ZPM chu under 10 an ni hrim hrim ang
3) Congress tan din khaw chhuah ngaihna a awm tawh lo
4) ZPM chu an duh loh ṭhin duh lo thei loin an awm tawh
5) MNF chuan a tlem berah seat 30 kan lak ka ring
6) Tum ropui tak neia kal kan ni