Governor-in DoNER Minister Mizoram project-te a sawipui

Mizoram tana sorkar laipui dawra New Delhi-a châm mek governor Hari Babu Kambhampati chuan nimin khan DoNER minister G Krishan Reddy a pisa-ah kawmin, Mizoramin project pawimawh tak tak a thehluh DoNER aṭanga sanction rawn kal tura beisei mekte a sawipui.

Larsap chuan DoNER Minister hnenah hian Mizoramin project a thehluhte chu Mizoram tana a pawimawhna leh a hmanhmawh thlak dan sawiin, a theih anga hmaa rawn sanction sak turin a ngen a ni.

Governor leh DoNER Minister inkawmnaah hian PM DeVINE hnuaia project te, Power & Electricity dept. hnuaia project pawimawh tak tak thehluh te, Tourism department hnuaia project thehluhte leh a dangte pawh sawilan a ni.

DoNER Minister chuan heng project thehluhte hi lo enzui a nih tur thu a sawi niin sorkar thuchhuah chuan a tarlang.