Social media-a thu leh hla tam takin Mizo society a tichhia - IPR Minister

Information and Public Relations (IPR) minister Lalruatkima chuan, social media-a thu leh hla tam takin Mizo society a tihchhiat thu sawiin, Mizo ṭawng dik leh nunphung dik mipui zirtir kawngah ṭan la zual turin chanchinbumite a chah.

IPR Minister hian nimin khan a pisaah MJA General Headquarters hruaitu tharte léngah sáwmin thingpui a inpui a; thu sawiin, "Youtube-ah Mizo ṭawng dik loa thil sawi a tam a, social media-ah ṭawng dik lo hman a tam hle. Social media-a thu leh hla tam tak hian kan society hi a tichhiain ka hria, hei vang hian kan chanchinbumite'n ṭan an lak lehzual a ngai a ni," a ti.

Lalruatkima chuan, MJA golden jubilee lawmna leh General Conference tluang taka neih a ni chu lawmawm a tih thu sawiin, "Hruaitu tharte kan nei a, a lawmawm; duhsakna kan hlan che u. Thuràwn inpe tawnin i infinchhuah zel ang u," a ti a; IPR department lamin an tih tur a awm a nih chuan fin chhuah zel turin a chah.

Press enclave an la bawhzui zel rualin, hmalakna a chak thei lo tih sawiin Lalruatkima chuan, "Kan la ropui viau thei lo," a ti a; Journalist Pension Scheme a kal chho zel tih sawiin, "A la kal zel ang a, file a la kal mek. In duhthusam hunah kan ti thei kher lo ang, tihhlawhtlin erawh kan nghakhlel a, a ṭul ang zelin hmalak kan tum," a ti.

IPR Minister chuan, MJA member-te tan press tour leh Parliament training buatsaih chu a ṭul anga sawiho zel a nih tur thu te, advertisement rate chu a hun chhungin tihsan ni tawh mah se, duhthu a la sam loh thu leh ngaihtuahna an hman zel dawn thute a sawi bawk.

MJA Gen.Hqrs president C Lalrambuatsaiha chuan, press mite leh IPR department thawhhona a ṭha tih sawiin, "Hetianga thawhhona ṭha hi state dangah a awm kher lo mai thei. MJA min ngai pawimawh ṭhin a, kawng tinréngah min duhsak ṭhin a, kan lawm hle a ni," a ti a; advertisement, press tour, Journalist Welfare Fund chungchangte a sawi lang bawk a ni.

Inkawmhonaah hian IPR secretary Hualsangi, additional secretary Betsy Zothanpari, director C Lalnunkima leh joint director pahnih - Lalfakzuala leh PB Lianthangpuii te pawh an tel a; journalist-te leh IPR department kaihhnawih thil chi hrang hrang an sawiho nghal bawk.