Hmun kilkhawr leh hnufual deuh khuaah Infiamna ruhrel din kan tum - DCMA Minister

District Council & Minority Affairs (DCMA) minister R Lalzirliana chuan Mizoram sorkarin ram chhung hmun kilkhawr leh hnufuah deuhahte infiamna ruhrel din an tum thu a sawi.

Nimina Keifang Centenary Football Ground-a MFA Cup, 2022 final match puala inkhawm buatsaih a hmanpuinaah thu sawiin DCMA Minister chuan, "Mizoram sorkarin ṭhalaite hmasawnna atan infiamna ruhrel siam kawngah nasa takin hma a la a ni. Khawpuia chengte leh thingtlanga chengte'n hmasawnna an têm rual theihnan theihtawp a chhuah," a ti.

R Lalzirliana chuan DCMA pawhin ram chhung hmun kilkhawr leh hnufual deuh khaw hrang hrangah infiamna ruhrel, khawpui lian zawka chengte'n an neih ang hi theih chin chinah chhawp chhuah sak tumin ṭan an la tih sawiin, "Covid-19 vangin ruahmanna awm saah pawh hma kan la thei lo," a ti a, dinhmun a ziaawm takah chuan che ṭan thei turah an inngaih thu a sawi.

Tuna project an neih sa bakah eng emaw zat neih belh an inbeisei thu sawiin R Lalzirliana chuan, "Mizoram hmun kiltin aṭangin infiammi ṭha ber ber lo chhuak se tih hi kan duhthusam a ni a, hma pawh kan la zel ang," a ti.

Ṭawi Bialtu MLA hian nimin vêk khan Saitual KVI rama Saitual DC pisa tur sak mek tlawhin, hnathawh dan a enfiah. Saitual DC pisa hi chhawng lia sanga sak tura ruahman niin, chhawng tin sq. metre 585.64 a zau a ni. Kum 2023 kum tawp hmaa sak zawh hman tuma ṭan lak a nih thu a satu contractor-te chuan R Lalzirliana hi an lo hrilh.