Mi thinlungah ZPM-in hna a thawk nasa - ZPM President

Zoram Peoples Movement (ZPM) chuan nimin khan an pisa-ah chhung inkhawm an hmang a, an president Lalliansawta chuan mi thinlungah ZPM-in hna a thawh nasat thu a sawi.

ZPM President chuan tunhnaiah Mizoram hmun hrang hrangah an feh chhuah thu sawiin, "A thlawnin tumah kan haw lo. Hmun tinah lawmluh tur an awm a, kan thawhrimna a thlawn lo. Pawl boruak a ṭha a, ṭhahnemngai taka thawktute chungah lawmthu ka sawi a ni. Mite thinlungah ZPM-in hna a thawk nasa hle," a ti.

An hma lawkah Lunglei Muni­cipal Council leh Mara Autonomous District Council inthlan a awm dawn tih sawiin Lalliansawta chuan, "Hemi atan hian general head­quarters-in nasa takin ngaihtuahna a seng a, chakna chang ngei turin hma a la a ni. Heng inthlan chung chang buaipui tur committee hi din a ni tawh," a ti a, candidate turte reng reng chu headquarters ruat tur a nih thu a sawi.

ZPM President chuan kum 2023 MLA inthlan lo awm turah pawh headquarter-in candidate tur mi ṭha tak tak a ruat dawn thu sawiin, "Party mite chiai lo tur leh thu lengvak mai mai buaipui lo turin ka duh che u a ni,” a ti.

Tunhnaia hmun hrang hranga zin chhuakte'n report an pek danin, Zoram hmun hrang hrangah ZPM zawm thar mi ṭhahnem tak an awm a, zawm tura inkau pawh mi ṭhahnem tak an awm mek a ni. Mizoramin sorkar a hrawn tawh teah mipuite an beidawngin ZPM chu an innghahna leh beiseina awmchhun a ni, an ti.