Vawiin aṭangin sikul kal ṭan dawn
Covid-19 avanga hun eng emaw chen sikul kal theih a nih loh hnuah vawiin aṭang hian kum 2022-2023 academic session atan sikul kal ṭan a ni tawh dawn.
Sikul kal theih a nih loh avang hian kum 2020, 2021 leh 2022 academic session-ah chuan board - class X leh class XII bak chu online hmanga exam tir an ni.
Board exam hmachhawn tur class X leh XII zirlaite chuan a khât tawkin sikul an kal thei a, an kal theih hnuah pawh hripui vangin an chawlh a ngaih chang a awm leh ṭhin.
Sikul kal ṭan a nih tur chungchangah hian Education minister Lalchhandama Ralte chuan naupangte chu lehkha zirtir mai loa, lo titlangnel hmasaa hripui laka fimkhur dan turte pawh lo zirtir turin zirtirtute a chah.