KHAWTHLIR

Ṭanpuina sem
Nimin khan Tourist Resort, Reiekah Mission Foundation Movement (MFM) chuan Reiek RD Block huam chhunga Organic Farming Project an kalpui aṭanga beneficiary thlanchhuah mi 75-te hnenah ṭanpuina an hlan a, bialtu MLA Lalrintluanga Sailo-in ṭanpuinate hi a sem. Social Welfare & Tribal Affairs department leh Ministry of Tribal Affairs puihnain MFM chuan project hi kalpuiin, mi 75 hnenah hian thlai chi hrang hrang, chem, bawngtuthlawh, suahdur leh tui pipe bakah Rs 3,000 ṭheuh an hlan a ni.

Lirthei kal hun
Aizawl SP C Lalruaia chuan Aizawl - Thenzawl - Lunglei road (state highway) a Hualngohmun khawhnuai kawng leimin ṭhin chu siamṭhat hna thawh a nih dawn avangin helai kawnga lirthei kal theih hun tur leh kawng khar hun tur a bithliah. Lirthei kal theih hun turte chu zing dar 9-10, chhun dar 1-2 leh tlai dar 5-6 a ni a, kawng khar hun tur chu zing dar 6-9, chawhma dar 10 - chhun dar 1 leh tlai dar 2-5 a ni.

Hnathawh endik
Tuivawl bialtu MLA Lalchhandama Ralte chuan nimin khan hmar tlangdung a tlawh a, hnathawh mekte a hmunah a endik. Lalchhandama hian Mauchar leh Palsang khuaah hmarlam tlangdung inkalpawhna kawngpui siam mekte leh feh kawng ṭhenkat siam mekte a endik a; he kawngpui hian heng lai hmunte hi Aizawl aṭanga tlawhpawh awlsam zawka a siam dawn bakah kawng tam takah hmasawnna a thlen dawn niin a sawi.

Kangmei tuarte Ṭanpuina hlan
March 21, 2022 zana Champhai Kahrawt Venga kangmei tuar chhungkaw pakua hnenah nimin khan Champhai Officers' Club (COC) member-te chuan an pawisa thawhkhawm Rs 1,20,000 an hlan. COC hi an member-te sum thawhkhawm hmangin mamawhtu leh ṭanpui ngaite puiin an lo fehchhuak fo tawh ṭhin a ni.