EFCC Minister-in Serlui leh Tuirial bial a tlawh ; Ramngaw leh nungcha humhalh dan tur a en

Nimin khan Environment, Forest & Climate Change (EFCC) minister TJ Lalnuntluanga chuan Serlui leh Tuirial biala YMA park leh ramngaw humhalhte a tlawh a, ramngaw leh nungcha humhalh zel dan tur a enfiah.

TJ Lalnuntluanga chuan Kawnpui 'Zo ngaw' leh EFCC dept.-in medicinal plant siamna atana an lo ruahman tawhnate a tlawhnaah thusawiin, "Ramngaw humhalhna leh mihringte'n boruak thianghlim kan dawn theihna tur atan leh eco-friendly kalpui leh enkawlzui a nih zel theih nan central scheme pakhat 'Nagar Van' aṭangin cheng vaibelchhe 2 hman phalna min pe a ni," a ti a, Kawnpui YMA hruaitute a rang lama proposal siam turin a chah.

Bilkhawthlir Joint YMA Park a tlawhnaa khawtlang hruaitute'n park-ah hian khawthlirna (watch tower) leh ṭhuthahchawlhna (waiting shed) engemawzat siam leh sava tlan thing phun leh pangpar tam zawk khâwi leh thil dangte hmanga ti changtlung tura an lo ngen chungchangah EFCC Minister chuan a enzui tur thuin a chhang.

EFCC Minister hian Serlui B Hydel Project pawh tlawhin, tuikhuah vaukam tawn tawna thing leh mau chereu mek chu tui tlem chhan pakhat a nih thu sawiin, thing phun belh hmanga humhalh dan tur te, vaukam lama lei tawlh ṭhinin tuikhuah a hnawh dan te, lei tawlh tur ṭham khawmtu thing leh mau chereu vanga harsatna awm theite a enfiah.

Minister hi Serlui bialtu MLA Lalrinsanga Ralte, Tuirial bialtu MLA K Laldawngliana, PCCF Jitendra Kumar leh Kolasib DFO Margaret Lalramchhani ten an ṭawiawm a ni.