Zofate Pathian Biakinpui hlimthla (model) tlangzarh

Zoram Thar Zofate Lairelna Inpui hruaitute chuan nimin khan Aizawl Press Club-ah thuthar thehdarhtute an kâwm a; an hruaitu Rev.Dr Zaichhawna Hlawndo-in Thenzawla Zofate Pathian Biakinpui an sak tur hlimthla (model) a tlangzarh. Rev.Dr Zaichhawna Hlawndo chuan, Zofate Pathian Biakinpui chu an sak ṭan dawn thu sawiin, kohhran pawl bik awm lo, Zo fa zawng zawng tana biak-in tur a nih avangin sum leh pai leh thâ hmangin a duh apiang tan hnatlan theih a nih thu a sawi. Zoram Thar ziaktu lian Lalruatfeli Hlawndo sawi danin, an biak-in sak tur chu khawvela biakin lian ber tur niin, a ram zau zawng chu square metre 23,809.52 a ni a, biak-in chu ft. 270 bial a ni dawn a, khawvela biak-in lian ber ni mek St. Peter’s Basillica aiin a lian zawk dawn a ni.