NH 44A siam hna thawh mek a ni Beisei hunah thawh zawh a ni lo

NH 44A siam hna thawh mekah, a hmanhmawh thlak zual lai nia ngaih, Dapchhuah Lui aṭanga Dampui khâm inkar (km. 47-57 chainage) chu hnathawktute'n zawh fel hun tura an ruahman - March, 2022 chhungin zawhfel hman a ni lo.

NH 44A siam hna chu hun engemaw chen chawlhsan a nih hnuin Rajya Sabha MP K Vanlalvena, Mamit bialtu MLA H Lalzirliana leh PWD hmalaknain hun leh sum ennawna thawh chhunzawm a ni. February 9, 2022-ah hna ṭan leh niin Dapchhuah lui leh Dampui hnuai khâm inkar (km. 47-57) chu March 2022 chhunga zawhfel hman an inbeisei thu hnathawktute chuan an sawi a, mahse an zo fel hman lo a ni.

Thuthar thehdarhtute zawhna chhangin PWD hotute chuan, an tum huna an zawh loh chhan chu an inchhût sual (miscalculation) vang te, a hmuna hnathawk viltu SDO/JE/SA indaih loh vangte leh ruahtui tla vangte niin an sawi.

Tun hnuah chuan hetiang ang harsatna ṭhenkhat - miscalculation leh hna viltu indaih loh vanga a hna muang ang chi hi a thlen tawh loh an beisei thu sawiin, "Ngawrh taka hna vil turin SDO-in hna a zawm tawh a, a riah chilh nghal a ni. Helai kawng bik hi chu April 22, 2022-ah chuan a zo fel ngei ngei tawh tura ngaih a ni," an ti.

Kawngpui siam hna thawhna tur hian MoRTH chuan ni November 25, 2010 khan cheng vbc. 624.41 a sanction a, he sum hian hna zawh theih a ni lo. January 2, 2015 khan a vawi khatna atan sum tihpun niin cheng vbc. 713.50-ah tihsân a ni a, a vawi hnihna turin ni June 21, 2018 khan sum ruahman chu cheng vbc. 992.67-ah tihsân leh a ni.

Heti chung hian hna thawh zawh theih a nih loh avangin Mizoram sorkar chuan September 1, 2021 khan sum ennawna cheng vbc. 1117.21 a tihpun turin rawtna/ngenna MoRTH-ah a thlen a, hei hi ngun taka ngaihtuah a nih hnu leh Finance Division-in October 28, 2021-a a pawmpui hnuah cheng vbc. 1109.88-ah tihpun leh a ni.