Poshan Pakhwada khâr a ni

Directorate of Women & Child Development-in ei tur hrisel lam hawia infuihna leh inzirtirna Poshan Pakhwada (Nutrition Fortnight) an buatsaih chu nimin khan Aijal Club-ah khâr a ni a, Social Welfare secretary Sangchin Chinzah-in a hmanpui. Poshan Pakhwada hi March 21, 2022 khan hawn a ni.

Inkhawmah hian Early Childhood Care & Education (ECCE) video clip insiamsiak result puan a ni a; Pukpui Centre-I, Lunglei district chu pakhatna a ni. Pahnihna chu Bualpui AWC-I, Kolasib district a ni a, pathumna chu Chanmari West AWC-III, Aizawl district a ni.

Sangchin Chinzah chuan, ram leh hnam hmasawn nan ei leh in tur hrisel neih a pawimawh tih sawiin, "Poshan Pakhwada hlawhtling taka hmang tur hian Women & Child Development chauhin hma a la thei lo a, kan thawhpui hrang hrang AYUSH, Health Services, MzSRLM, LAD, UDPA, YMA, kohhran ṭhalaite leh T Romana College-te nena kan thawhhona vanga hlawhtling thei kan ni," a ti.

Poshan Pakhwada thupui, ‘Identification & celebration of healthy child & integration of modern & traditional practice for healthy India’ tih chu a nih ang taka kalpui a pawimawh thu sawiin Sangchin Chinzah chuan, "Nu nau pâi leh naupang hrisel ṭha tak nei thei turin kan thil ei uluk ila, ṭhalaite'n taksa sawizawi bakah, ei leh in hrisel kan uar a ngai," a ti a; chaw ṭha ei pawimawhna zau zawka inzirtir turin kal khawmte a chah.

Poshan Pakhwada khàrna inkhawmah hian WCD director Lallianpuii, AWTC principal Lalrammawii Kawilam, Poshan Abhiyaan state nodal officer Lalmalsawmi, WCD joint director Zoramthangi Chhangte leh mi pawimawh dangte an tel a ni.