LMC-a ward ṭhen dan tur sorkarah thlen a ni tawh

Lunglei Municipal Council (LMC) ward ṭhen dan tur ruahmanna chu sorkar pawmpui turin thehluh a ni tawh a; LMC-a thawk turte lâk chungchangah Finance department phalna nghah mek a ni. Ruahman dan chuan, LMC-ah hian ward 11 a awm ang.

Vanglaini thu dawn danin, Lunglei bawrhsap Kulothungan A-a'n LMC atana Lunglei khawpui chhunga veng hrang hrangte ward-a ṭhen dan tur ruahmanna chu a peih tawh a, ruahmanna chu sorkar pawmpui turin a thehlut tawh a ni.

January 24, 2022 khan LMC atana chief executive officer, secretary, superintendent, finance & accounts officer leh assistant post-te siamna tur hriattirna tihchhuah a ni a; Vanglaini thu dawnna chuan, post hrang hrangte hnawhkhahna turin Finance department-ah phalna lak mek a nih thu leh Lunglei khawpuia village council-te local council-a thlak dan tur pawh ngaihtuah mek a nih thu a sawi.

Tarlan tawh angin, LMC dinna tur hian November 24, 2021 khan hriattirna chhuah a ni. Assembly budget session-ah khan chief minister Zoramthanga chuan, hmasawnna kawnga mipui mamawh phuhrûk nan leh awmze nei zawka local administration kalpuina hmanrua atan LMC chu a hma thei ang bera bul ṭantir an tum thu a sawi a, "Tun dinhmunah bul ṭanna atan cheng nuai 80 chu hemi pual hian ka dah. A ṭul anga fund allocation tihbelh leh zel theih tura ruahman a ni," a ti.