Ni 104 hnua hripui vei hmuh tlem ber ní Ni 345 hnua active case tlem lai ber a thleng

April 3, Pathianni khan Mizoramah Covid-19 vei mi 34 hmuh chhuah a ni a, ni 104 hnua positive hmuh chhuah tlêm ber ní a nih bakah, nimin tlai kha ni 345 hnua active case tlem lai ber a ni. Nimin khan hripui vei dam tawh mi 202 chhuahtir an ni a, Covid-19 vei thi an awm lo.

Covid-19 vei Pathiannia hmuh thart mi 34-te chu mipa 15 leh hmeichhia 19 an ni a; RAT hmanga hmuh chhuahte vek niin, positivity rate chu 7.52% a ni. RT-PCR, TrueNAT leh FIA hmangin swab sample endik a ni lo.

April 3, 2022-a Covid-19 positive hmuh chhuah zat, mi 34 hi ni 104 hnua hmuh chhuah tlem ber ní a ni a, December 19, 2021 khan mi 33 hmuh chhuah an lo ni tawh a ni.

Nimin tlai dar 5 dinhmun angin Mizoramah Covid-19 vei inenkawl mek (active case) mi 687 chiah an awm a, April 25, 2021 hnu (ni 345 hnu)-a active case an tlem ber ṭum a ni. April 25, 2021 tlaiah active case 712 an awm a, a hma ní, April 24-ah mi 634 an awm thung.

IDSP record angin, Mizoramah Covid-19 vei 2,24,788 hmuh chhuah a ni tawh a, mipa 1,04,774 leh hmeichhia 1,20,014 an ni a, mipa aiin hmeichhia 15,240-in an tam zawk. Nimin tlai dar 5 thleng khan mi 2,23,325 (99.35%) chhuahtir an ni tawh a, mi 687 (0.31%) thi tawhin, enkawl mek mi 687 (0.31%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,24,788 chu mi 1,000 zelah hripui vei mi 204 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.