MNF-te'n CADC CEM an dang, innawr buai-naah mi paruk hliam

Chakma Autonomous District Council (CADC)-a MNF ṭhalaite chuan, CADC sorkara Indian National Congress (INC)-te BJP nena an thawhhona aṭanga an inhnuhdawh hnu pawha chief executive member (CEM) Shanti Jiban Chakma-in a hna a thawh chhunzawm zel duh loh lantirna atan, nimin khan CADC Secretariat kawtah an pungkhawm a, CEM chu office kal lo turin an ngen. Mipuite chu CRPF-te nen innawr buaiin, mi parukin an hliam.

CADC-a MNF ṭhalaite tarlan danin, Shanti Jiban Chakma chuan an ngenna ngai pawimawh loin office kai luh a tum a; security duty CRPF sipaite'n magisterial order awm loin mipui pungkhawmte kut an thlak nghal a, mi paruk an hliam a, pahnih chu damdawi-inah admit an ni.

He thil thleng chungchangah hian CADC-a MNF ṭhalai president Molin Kumar Chakma chuan Chawngte Police Station-ah FIR a thelut a; CRPF-te kut tuarin mi parukin hliam an tawrh thu leh hliam zinga mi Prem Jyoti Chakma chu nikhaw hre loa a awm thu a tarlang. Police-te chu CRPF-te chungah dan anga hma la turin a ngen a ni.