Governor-in Hornbill Festival a hmanpui

Governor Kummanam Rajase-kharan chu nimin khan Kisama Village, Kohima, Nagaland-ah Hornbill Festival ni ruknaah khuallian a ni a, Hornbill Festival chu India rama festival a chhim châk zinga mi a ni tih sawiin, kumina a chhim thei ta chu lawmawm a tih thu a sawi.

Kummanam Rajasekharan chuan, Naga mipuite lawmpuina hlanin, Hornbill Festival chu a tàwp ní, December 10 thlengin hlim taka hmang turin duhsakna a hlan a, "Hnam lâm, infiamna leh hnam bila kan neih kan thu leh hlate hi hmun danga kan hnam thil phochhuaktu ṭha ber berte an ni a, chuta tan chuan Hornbill Fetival hi a ṭangkai hle a ni. Hornbill Festival hi Nagaland chhung mai ni lo, hmarchhak biala kût hlawhtling berte zinga mi a ni," a ti.

Hornbill Festival hi kum 2000-ah hman ṭan a ni a, kum tin December 1-10 chhung hman a ni ṭhin. Kuminah hian December 5, Nilaini thleng khan Nagaland state pawn aṭangin ram pawn mi (foreigner) 2,000 chuang leh India ram chhung mi 15,325-in an chhim tawh a, state chhung mi 80,000 velin an chhim tawh bawk.