Pre World Cup Mizoram Open Paragliding Accuracy Championship neih mek a ni

Serchhip dáia Pre World Cup Mizoram Open Paragliding Accuracy Championship 2018, December 4, Thawhlehni zana hawn tâk chu chhunzawm mek zel a ni a, ram hrang hrang aṭangin mi eng emaw zat telin, naktukah khâr a ni ang.

Pre World Cup Mizoram Open Paragliding Accuracy Championship-ah hian Serchhip leh Keiṭum inkar, NH-54 chunga Bâwngchâwm ram, Dàpzar kâwn aṭangin an thlâwk chhuak a, Záwlpui leilet záwlah a ṭumna tur siam a ni. Inelna hi Fédération Aéronautique Internationale (FAI) hriatpui a ni a, endiktu tur pawh Slovenia leh Japan aṭangin an tel a ni.

Intihsiaknaah hian India ram chhun bakah, ram dang pakua aṭangin pilot 52 an tel a, intihsiaknaa tel lo, pilot-te puitu mi 20 vel an rawn kal a; Mizo glider/pilot-te pawh an tel.

Hetiang intihsiaknaah hian mi pakhat vawi nga vel zel an thlâwk ṭhin a; tun ṭumah erawh chuan pilot an ṭhathnem avang leh a hun chhung a rei loh avangin vawi thum vel ṭheuh an thlawk dawn a ni.

Pre World Cup Mizoram Open Paragliding Accuracy Championship hi Thawhlehni zan khan Serchhip Auditorium-ah Planning secretary Dr C Vanlalramsanga'n a hawng a; Vanlalramsanga chuan, Mizoramin paragliding championship-a glider/pilot-te tan infrastructure leh accomodation ṭha chhawpsak thei lo mah se, duhsakna a hlan.

Dr C Vanlalramsanga chuan, India ram state hrang hrang leh ram dang pakua aṭanga glider/pilot kal khawmte chuan inunauna leh inṭhian ṭhatna chhar chhuak ngei se a duh thu a sawi a; khawvel huapa inelna Mizoramin a thlen theihna tura hma latu leh buaipuitu Mizoram Aero-Sport Association hruaitute leh Serchhip mipui inpekna fakawm a tih thu a sawi bawk.