Inremna aia toa balu lei lo turin ngen

All Mizoram Cement & Iron Rod Dealers Association (AMCIRDA) chuan thuchhuah siamin, Kolasib DC, Cachar DC leh balu mahaldar-te inremna aia sanga Bagha balu lei lo turin balu zuarte an ngen.

AMCIRDA chuan, Covid-19 vanga Mizoram lirtheite state pèl thei loa an awm laia Bagha lam aṭanga bungraw rawn phur ṭhin vai hoin an duh duha balu rate an tisang chu ṭha lo an ti tih an tarlang a; hun harsa ramin a hma­chhawn mek remchanga la a, Mizo mipui tana harsatna siam lo turin Cachar lam mite a chah a ni.

Bagha lam mite'n an balute chu Mizoramah lo hralhna tur lian an nei lo tih sawiin AMCIRDA chuan, "Hei vang hian Mizorama balu zuar zawng zawngte'n kar hnih/khat chhung lek pawh kan lak luhsak duh lo a nih chuan a buai tur chu balu mahaldar, balu hmanga ei zawng ho, loan pûka motor leite tho khu an ni. Mizoram mipui hmakhua ngai a, balu zuar zawng zawngte ṭang rual leh zual turin kan inngenin kan insáwm a ni," an ti.

AMCIRDA chuan, cement man sáng chung­changah zawhna tam tak an dawng tih sawiin, cement man san chhan nia an hriatte an tarlang bawk.

#    Home department-in a duh apiangte tan state dang 

aṭanga bungraw lak luh theihna dan online application a siam hmanga cement zuar ṭhin ni lêm lote'n proper channel ni lo, company GST invoice tel loin Lailapur leh Silchar aṭangin cement an chah lût nasa a, heng ho hian mipuiah man sang tak taka an hralh avangin cement man sàn chhan lian takah kan ngai.

#    Proper channel ni lo, company GST invoice tel loa cement lo lut ṭhahnem tak a awm avang hian sorkarin chhiah (tax) tam tham tak a chàn phah ngeiin kan ring.

#    Motor hman tur a vàn avangin motor hman tur awmchhunte'n kal man an tisang hle a, motor hman man sangin cement man a tihsan phah bawk.