Myanmar MP-in Zofest hmanpui

MZP general headquarters-in Reieka Zofest 2018 an buatsaih chu nizan khan a ṭiak a, vawiinah palaite an haw ang. Zofest-ah hian nimin khan pandal, Zo Inpuia inkhawmah Myanmar sorkara member of parliament (MP) Ebenezer Siami khuallian a ni a, Lok Sabha MP CL Ruala chu uaptu a ni.

Ebenezer Siami chuan, inter­national boundary avangin ram hrana awm ni mah se, Mizote inpui ngeia thu a sawi thei chu nuam a tih thu sawiin, "Hei hian ramin rî a nei a, hnam chuan rî a nei lo tih a entir a ni," a ti. Zo fate chu an awmna ram sorkarte'n Chin, Kuki, Mizo tiin chhinchhiah mah se, Chhinlung chhuak thlahtu hmun khat, chhûl khat kual, unau an ni tih sawiin, "Zo fate kan chenna a piang hi kan ram a ni a, ram ṭhen darh hrang hrangah cheng mah ila, unau kan nihna a bo lo a, thlang tla hmasa leh hnuhnung kan awm mai zawk a ni," a ti.

Kum 1970 hnu lamah Burma ram chu economy-ah naša takin a tlachhia tih sawiin Ebenezer Siami chuan, "Chin mi, Mizorama ei leh bar zawnga tla thlate Mizo mipuite'n duat leh dawhthei takin unau kan nih hre rengin in lo enkawl a, kan lawm hle," a ti a; Zo fate chenna sorkar leh sorkar inkarah inhmuh thiam lohna thleng ṭhin mah se, Zo fate inunauna tichhetu ni lo se a duh thu a sawi.

Myanmar MP chuan, Zo fate inunauna chu engmahin a tihchhiat an phal dawn lo tih sawiin, "Kan inunauna leh inpumkhatna a ngheh zual zel theih nan i thawkho zel ang u. Zofest 'Hmangaihna khawmpui' kan neih leh tur hi khawchhak Zo fate chenna ngei Burma ramah hlim takin kan hmanho theih ngei ka beisei a ni," a ti.

Mizoram aṭanga Lok Sabha MP CL Ruala chuan, Zofest chuan rah duhawm tak chhuah se a duh thu sawiin, "Zo fate kan insuihkhawm hun a nghahhlelhawm tak zet a ni," a ti a; Mizote chu an awmna apiangah rinawm taka hna thawk a, mite ṭanpuitu ni zel turin a chah.

MZP president L Ramdinliana Renthlei chuan, Mizoram humhalh duh avangin MZP-in hma an la tih sawiin, Zophaia chawlhbûk an sak chu ṭhiahsak an nih ṭumin MZP member-te silaia kah leh vuak an ni tih a sawi a, "Khatih lai khan MZP chuan chhantu ngaiin a ṭap a, sorkar kan au a, chhànna kan hmuh tak lohah chuan Pathian tal kan au ei tur a ni tiin kan ṭawngṭai a, kan ṭawng-ṭai chhànna chu vawiina hmun hrang hrang aṭanga Zo hnahthlak lo kal khawm Zofest hmangtute hi in ni," a ti.

Zofest hmasa ber chu kum 2002 khan Manipur-ah hman a ni tih sawiin MZP President chuan, kumina an hman chu a ṭum 8-na a nih thu a sawi a, "Mizoram páwnah dodalna hnuaia kan hman cháng pawhin unau kan nihna pholana a awm ṭhin hi a lawmawmna tizualtu a ni. Pathian hruaina nasa tak tun thlengin kan dawng a ni," a ti a; Zofest tum ber chu - Mizo chi péng hrang hrangte insuihkhawm a, unau an nihzia inhriattir zel a nih thu a sawi.

Nimina Zofest hmannaah hian hockey player Lalremsiami, weightlifter Jeremy Lalrinnunga leh Zofest a pian theih nana sûlsutu Lalthuthlungliana, MZP Manipur president hluite hnenah chawimawina thuziak hlan a ni.

Miss leh Mister thlan a ni a; Zofest 2018 Miss atan Mai May Thang Pai, Chin Students Union, Myanmar leh Zofest Mister atan James Molsom, Tripura thlan an ni.

Zofest-ah hian nizan khan palai thlahna inkhawm hman a ni a, Myanmar MP Dr Kyi Moet Moet Lwin chuan a hmanpui a ni.