Vote chhiar turin inbuatsaih mek a ni

November 28, 2018-a Assembly inthlanpui neih zawh taka vote tlate December 11, 2018-a chhiar turin district hrang hrangah inbuatsaih mek a ni.

Lungleiah chuan nimin khan DEO Dr Ankita Chakravarty hoin DC conference hall-ah returning officier leh candidate agent-te an ṭhukhawm a; Ankita Chakravarty chuan, Lunglei district-a vote tlate chu Saikuti Hall-ah chhiar tur a ni a, Assembly constituency pasarih tan counting hall hran ṭheuh siam a nih thu a sawi.

Lunglei DEO sawi danin, December 11 zing dar 8-ah constituency tinte'n a rualin vote an chhiar ṭan dawn a, postal ballot-a vote tlate chhiar hmasak phawt tur a ni. Zing dar 8:30 aṭangin EVM-a vote tlate polling station indawtin chhiar ṭan a ni ang a, vote chhiar chu constituency tin tan round thuma zawh tum a ni.

Meeting-a an rel dan chuan, Election Commission of India (ECI) duh dan angin, inthlan vote chhiar chhungin Saikuti Hall leh a chhehvelah venhimna khauh tak siam tum a ni a, mipui náwlpui paltlang theih loh turin chhim leh hmarah check-gate siam a ni dawn a, gate-ahte chuan luh phalna identity card nei lo tan chuan a luh tlang theih a ni dawn lo.

Siahaah chuan vote chhiar­ dan tur chungchangah hian nimin khan DEO Zoengsanga hoin DC conference hall-ah candidate hrang hrang aiawhte an ṭhukhawm.

Siaha DEO chuan, MLA in­thlanah chanvo hrang hrang hrang changte'n an tih tur ṭheuh ngai pawimawh a, ṭhahnemngai taka hna an thawh avangin hlawhtling takin inthlan a nih thu a sawi a, "Kan inthlanna felfaizia leh muanawmzia te, complaint pakhat mah lut a awm lote an hmuh hian, kan observer-te pawhin mak an ti hial a, kan district hi min ngaisan phah sawt ka ring," a ti.

Meeting-ah hian vote chhiar dan tur te, venhimna chung­chang, political party agent-te hriat tur leh thil pawimawh dang hrang hrang sawiho a ni.

Serchhipah chuan vote chhiar dan tur chungchangah nimin khan SDO (Sadar) R Vanrengpuia hoin DC conference hall-ah counting supervisor, counting assistant leh micro observer-te an ṭhukhawm.

Meeting-ah hian EVM-a vote tlate chhiar dan tur a lem nen sawifiah a ni a, EVM control unit leh VVPAT-te hmangin a takin vote tla hi chhiar chhin a ni bawk.

Lawngtlaiah chuan nimin khan DC conference hall-ah December 11 vote chhiar tura ruatte vote chhiar dan tur zirtir an ni. Lawngtlai district-a constituency pathuma vote tlate chu Govt. Lawngtlai College-ah counting hall hran ṭheuhah chhiar an ni ang.

Constituency pathumah hian polling station 161 awmin, polling station 59 awmna Tui­chawng bial counting hall-ah vote chhiarna tur dawhkan 12 hun a ni a, polling station 68 awmna Lawngtlai West bial counting hall-ah dawhkan 14 hun niin, polling station 34 awmna Lawngtlai East bial counting hall-ah dawhkan 10 hun a ni.