KHAWTHLIR

MNF nu ho lawm
MNF party-a nu ho pawl, Mizo National Women Front chuan thuchhuah siamin, MNF hmeichhiate'n bial tinah MNF official candidate-te tan ṭhahnemngai taka theihtawp chhuaha hna an thawk chu lawmawm an tih thu an tarlang a, "Kan hmeichhepuite'n theihtawp an chhuahna hi Pathian zarah a hlawhtlin ngei kan beisei," an ti.

Silai lem man
Aizawl police-te chuan hâlpuah, hâlmawi leh silai lem, a mu kâp chhuak thei khapna thupek bawhzuiin bazar hran hrang an endik mek zel a; December 4 khan New Market-ah mi pali hnen aṭangin silai lem, a mu kâp chhuak thei 30, Rs. 12,800 man an man a, December 5 khan mi pakhat hnen aṭangin silai lem 11, Rs. 16,500 man an man bawk. Silai lem neitute hi IPC Section hnuaiah thubuai siamsak an ni.

Tanpuina sem
Mizoram Bar Association (MBA) chuan charity fund atana an member-te thawhkhawm Rs. 2,50,000 chu nimin khan an pisaah an sem a, hmun hla deuha awmte chu an awmna hmunah an pe dawn. MBA hian Rs. 2,50,000 hi home, damdawi-in leh chhung-kaw harsate hnenah an sem a ni.

Fimkhur tur
Aizawl Traffic SP chuan thupek chhuahin, December 9, 2018 zing dar 9 aṭanga tlai dar 5 chhungin Vaivakawn huam chhungah SIPMIU-in pipe an phûm vanga kawng an laih chhiat siamṭhat hna an thawh dawn avangin, hna thawh hun chhungin lirthei khalhtute fimkhur taka tlan turin a hriattir.

Sorkarin ral
Kolasiba nitin chanchinbu 'Duhlai' editor July 3, 2018-a thi C Thanmawia (accredited journalist) sorkarin a ralna chu nimin khan Kolasib IPR office-ah a chhungte hnenah hlan a ni a, IPR director David L Thangliana leh MJA president Zonunsanga Khiangte'n an hman pui. Sorkarin C Thanmawia a ralna Rs. 1,50,000 chu C Thanmawia nupui R Lalramthangi hnenah IPR Director-in a hlan.