Central service-a Mizo an tlin tam theih nan Synod-in hmalak an rêl

Mizoram Synod Inkhawmpui vawi 95-na chu Electric Veng Kohhran biak-inah hman chhunzawm zel a ni a; nimin khan moderator Rev. R Lalhmingthanga kaihhruaiin rorel chhunzawm niin, central service-ah Mizote an tlin tam theih nana hmalak an rêl.

Synod Inkhawmpui hian Lunglei East Presbytery aṭanga thu lut, 'Central service-a Mizote tlin tam theih nana hmalak rawtna' chu an pawm a, Synod Executive Committee (SEC) bawhzui turin an dah a ni.

Ruihhlo do kawngah Synod-in chak zawkin hma la rawh se, tih chu an pawm a, SEC bawhzui turin an dah a; sorkar aṭanga mimal dinhmun tihchianna atana kohhran hriatpuina phût ṭhin chungchanga rawtna pawh pawmin, SEC bawhzui tur bawkin an dah.

Nimina Synod Inkhawmpui rorelin a pass-te zingah - Presbyterian Kohhranin Mizo Kristian Inneihna Dan a hman mek chu Indian Christian Marriage Act-in a pawm tura hmalak te, Champhaiah Synod Rescue Home din te, Synod Hospital-ah Optical Coherence Tomography dah te, Kristian Hlabua hlate tidanglama kohhran programme-a sa lo tura inzirtirte a tel.

Synod Inkhawmpui rorel hi vawi­inah chhunzawm a ni ang a; naktuk Pathianniah chuan chawhmaah pastor nemngheh leh probationary pastor dahngheh inkhawm neih a ni dawn a, chawhnuah Lalpa Zanriah Sakramen ṭheh a ni ang.