COTPA Enforcement Week hawn a ni

Aizawl Traffic Police-te leh Mizoram State Tobacco Control Society (MSTCS) chuan lirthei khalhtute leh a chuangte-ah khauh zawka meizûk khuahkhirhna hapta, 'COTPA Enforcement Week' chu nimin khan traffic SP H Ramthlengliana'n Aizawl SP pisa conference hall-ah a hawng a; taxi driver-te hnenah COTPA dan inziah telna Krismas card sem tur a tlangzarh bawk.

Traffic SP H Ram­thlengliana chuan, traffic police-te chu indaih lo hle mah se, hunpui laiin kum danga 'no tolerence' an kalpui ṭhin bakah, COTPA kenkawh lam pawh theih ang tâwka kalpui an tum thu sawiin, "Hahin indaihlo hle mah ila, mipui náwlpui himna tur a nih phawt chuan kan thawk zel ang," a ti a; traffic police-te hna chu dan bawhchhia hrem tur ngawr ngawr zawn a nih thu leh, an duh ber chu dan bawhchhia leh hrem ngai awm loa mipui leh lirthei neitute insiamṭhat a nih thu a sawi.

Traffic police-te duty-na chu khawlai, pollution tamnaa a nih avangin chuapa lama harsatna nei pawh an lo tam thu sawiin H Ram­thlengliana chuan, mei zu bawkte phei chu an ngaihtuahawm lehzual thu a sawi a; kum thar lam project-ah traffic police hotute'n chhiar­pui neiin, anmahni zingah vaihlo zial ti zat leh nghei thei tura inpuih dan ngaihtuah ni se a duh thu sawiin, "Smoke free unit nih theih a châkawm hle," a ti.

COTPA Enforcement Week hawnnaah hian MSTCS aṭangin meizûk chungchanga sorkar dan awmsa leh COTPA dan hnuaia lirthei khalhtute leh public transport-a vaihlo khuahkhirhna awmte leh a hremnate an sawifiah.

COTPA Enforcement Week hawnnaah hian Aizawl traffic police hotu te, MSTCS hotute leh taxi driver association aiawhte an tel a ni.