Lawngtlaiah SHG hlawhtlinna lawm

World Vision India hnuaia Chhimtuipui Area Development Programme (CADP) hmalaknaa Lawngtlai leh Lunglei district-a hmeichhia self help group (SHG) hlawhtlinna lawmna hun leh SHG ti ṭhate chawimawina hun CYLA Hall, Lawngtlaiah nimin khan buatsaih a ni a, Lawngtlai DC N Chakhai-a'n a hmanpui.

Lawngtlai DC chuan, chhim lamah SHG ṭha tak tak a awm chu lawmawm a tih thu sawiin, "Mizoramah duhthusamin SHG kan la hlawhtlinpui lo zawk a, kan inzir zel ang a, kan la hlawhtlinpui dawn chauh. Chumi atana bul lo ṭan hmasate chu an chhuan­awmin fak an phu hle a ni," a ti.

Hmeichhiate'n SHG hmanga chhungkua leh khawtlang hma sawnna hna an thawh chu ropui a tih thu sawiin N Chakhai chuan, "Hmeichhiate hian kan theihna kan hriat chian a ṭha a, nasa leh zuala hmasawn turin taima leh rinawm takin hna kan thawk tur a ni," a ti a; Mizoram chhim lam chu Mizoram kawtchhuah a la nih dawn avangin tun aṭanga inbuatsaih lâwk a pawimawh thu a sawi.

NABARD-in SHG project a ruahman hnuaiah kum 2012 aṭangin Lawngtlai leh Lunglei district-ahte hmalak a ni a, CADP chu nodal agency atan hman a ni. Bank pahnih - MRB leh SBI-te nen thawkhoin, hmeichhiate'n SHG hmanga hma an sawn theihna atan an ṭanpui ṭhin. Bul ṭanna tur kawhhmuhin, training an pe a, an bul ṭan nan leh ṭhan zel nan bank loan an pe ṭhin bawk.

He project hnuaiah hian Lunglei dstrict-ah SHG 850 leh Lawngtlai district-ah SHG 600, a vaiin SHG 1,450 din tuma hma lak a ni a, target hi khûmin, tunah hian Lunglei district-ah SHG 898 leh Lawngtlai district-ah SHG 702, a vaiin SHG 1,600 din a ni tawh. SHG 292 chu loan pek tawh an ni a, pek mai tur 150 an awm bawk a; loan pek chhuah tawh zat chu cheng nuai 224.35 a ni.