Lungleia mite sample lâk ṭhat ngai Sorkar ruahman fel loh vang - MPYCC

Mizoram Pradesh Youth Congress Committee (MPYCC) chuan thuchhuah siamin, Lunglei Ramthar Veng BCM community quarantine centre-a awmte June 6, 2020-a swab sample lak a nih hnua June 18-a lak ṭhat leh a ngai chu sample inchawhpawlh vang leh sorkar ruahmanna fel loh vang liau liau a nih thu an tarlang.

MPYCC chuan, Lunglei Ramthar BCM CQC-a khung hran mi 10 zinga pakhat chu Covid-19 vei a ni tih hmuh chhuah a nih aṭanga ni 15 hnuah pawh CQC-a a awmpuite swab test result a chhuak thei lo tih sawiin, "Lungleia Health department hnathawkte'n swab sample ZMC-a an thawn chu pressure nasa tak a awm hnuah, an thawn aṭanga ni 12-naah endik tlak lohin sample a inchawhpawlh tawh tih hmuh chhuah a ni ta hi a pawi a, thil rapthlak tak a tling," an ti.

Swab sample a inchawhpawlh vanga ZMC Laboratory-ah Lunglei Ramthar BCM CQC-a awm mekte dinhmun an finfiah theih mai loh chhanah sorkarin mawhphurhna lian tak a nei tih sawiin MPYCC chuan, "Inpuahchahna hun rei tak sorkarin a neih laiin, ruahmanna a siam fel loh vanga hetiang hi thleng a ni," an ti a; sorkar inrêlbàwlna fuh loh vangin khung hran mekte thlabár leh mang­angin an awm phah niin an sawi.

ZMC leh district hrang hrang­a Health department-a thawkte thawhrimna leh inpekna fakawm an tih thu sawiin MPYCC chuan, "Sorkar­in ruahmanna mumal leh felfai tak chu siam se chhùn zan zawma thawk a, rim tawngkhawnga awm lo tur hian an awm thei ang. Rimtawnga siam khawpa sorkarin hripui dona kawnga hma a la chak lo leh a ngaihthah hi a pawi tak zet. State dangin a rintlak loh an tiha an hnâwl RAT kan ring tlatte khan he sorkarin hripui dona kawnga kal ngaihna a hriat lohzia a pho lang," an ti.

Congress ṭhalaite chuan, a tir aṭangin sorkarin RT-PCR bun a harsatzia an sawi reng tih sawiin, "Congress Legislature Party leader Zodintluanga'n June 13, 2020-ah chhim lama awmte hman turin Lunglei Civil Hospital-ah RT-PCR dah a inhuam thu a sawi tûk maia sorkarin Lungleia RT-PCR dah tuma mithiam a tír nghal leh ambulance lei an tum ve ta chûk chûk hian nawr kal ngai sorkar an nihzia a pholang," an ti a; MNF kaihhruai sorkar chu eptute hnung zuiah an puh a ni.