Kuhva tawlh rûk venna checkgate-ah dan loa tawlh rûk kuhva man a la ni lo

Mizoram sorkarin dan loa Myanmar aṭanga Mizoram kaltlanga kuhva tawlh rûk vênna tura checkgate a siam, Serchhip dái Sailiamkawn leh Sairangah dan loa tawlh rûk kuhva man a la ni lo.

Central YMA chuan kuhva tawlh rûk vênna tur checkgate siam turin chief minister Zoramthanga leh sorkar hotu dangte an ngen ṭhin a, chumi hnuah Sailiamkawn leh Sairangah checkgate hawn a ni. Sairang checkgate-ah hian February 14, 2022 khan police an duty ṭan a, Sailiamkawn checkgate chu February 17, 2022-ah hawn a ni.

Vanglaini palai zawhna chhangin Sairang checkgate-a duty-te chuan, darkar 24 chhung an duty thu an sawi a, "Truck bungraw phurte kan endik ṭhin a, kuhva tawlh rûk tur man kan la nei lo. Ṭum khat chu kuhva rah kan man tawh a, mahse, ram páwna tawlh rûk tur ni loin, tualchhunga hralh tur a ni. Myanmar aṭanga kuhva rah an tawlh rûk ang chi a ni chiah lo," an ti.

Checkgate-a duty-te chuan, kuhva rah tawlh rûk a tlem deuh tawh a nih theih thu sawiin, "State páwn lamah an phurh tlang theih tawh loh avangin tawlh rûk tum an awm vak tawh lo a ni mai thei," an ti a; anmahni hêla kuhva tawlh ru an awm leh awm loh chu an hriat bik loh thu an sawi.

Sailiamkawn checkgate-ah chuan head constable hoin constable pathum an duty a, hawn a nih aṭanga nimin thleng khan lirthei 376 an enfiah tawh. Lirthei an enfiah zingah kuhva rah tawlh rûk man tur a la awm lo. Checkgate-a duty-te sawi danin, lirthei kal zawng zawng enfiah loin, bungraw phur leh rinhlelhawm zualte an enfiah ṭhin.

Sailiamkawn Checkgate-a duty-te chuan, khawchhak lam aṭanga bungraw phur lirthei lutte chu an enfiah uluk zual thu sawiin, "Kuhva rah hring phur chu an awm zeuh zeuh a, chungte chu man an ni lo. Kuhva rah ro phur ṭhinte chu an awm tawh rih lo niin a lang," an ti.

Hetih lai hian, Sailiamkawn checkgate-ah hian MVI lam pawh an duty ṭhin a, thuneitu sang zawkte thu angin lirthei document fel lo leh sorkar thupek zâwm lote chu man an ni ṭhin. Nimin thleng khan dan bawhchhia mi 42 an man tawh a, chu'ng mite chu dan angin pawisa an chawitir ṭhin. Dan bawhchhia an man zinga a tam zawk chu document fel lote an ni.