Kum hnih hnuah sikul hawn a ni ta

Nimin khan Mizo-ramah sikul kai ṭan a ni a, kum hnih pumhlûm chuang dan pangngaia sikul kài theih a nih loh hnua sikul luh lehna hmasa ber niin, zirlaite an phûr hle. School Education minister Lalchhandama Ralte chuan, sikul hawn a nih leh tâk avangin zirlaite leh zirtirtute a lawmpui thu a sawi.

Mizoram sorkarin a duan lâwk angin, dan pangngaia nimina sikul ṭan a nih leh takah hian Mizorama sikul tam berah chuan zirlaite'n sikul an kái ṭan nghal a, zirlai zir ṭan nghal erawh an awm lo nia thu dawn a ni. Sikul ṭhenkhat, nimina la hawng lo an awm bawk. Aizawlah chuan sikul hawn a nih leh tak vang nia rin theihin nimin khan traffic jam a nasa hle.

School Education minister Lalchhandama Ralte chuan nimina a bial chhunga khaw pathum - Ṭinghmun, Upper Sakawrdai leh Vaitin khua a tlawhnaah thu sawiin, sikul hawn a nih leh tâk avangin zirlaite leh zirtirtute a lawmpui thu a sawi.

Lalchhandama Ralte chuan, hripui avanga zirna khaihlak chu ramin a tawrh loh nan theihtawpa ṭan la turin khawtlang hruaitu te, nu leh pa leh zirtirtute a sáwm a, "Hripui avangin kum hnih zet sikul khâr a ni tawh a, vawiina sikul hawn a lo ni ta leh zirlaite'n sikul an pan leh thei ta hian min tihlim hle. Zirlaite leh zirtirtute ka lawmpui tak zet a ni," a ti.

Sikul hawn theih loh chhungin online leh kawng dang hmangin zirna kalpui a nih thu sawiin Lalchhandama chuan, "Network ṭhat tâwk loh avang leh hmanrua neih ṭhat tâwk loh avangtein zirlaite'n an thiam tur ang an thiam fumfê lo palh thei. Dan pangngaia sikul hawn a ni thei leh ta hlauh hi School Education deptt lama thuneitute duhthusam tihhlawhtlinna a ni," a ti a; zirna boruak ṭha a awm leh thuai theih nan ṭan la ṭheuh turin mi tin a sawm a ni.