Sports Minister-in ZMC a tlawh

Minister of state Robert Romawia Royte chuan nimin khan Covid-19 enkawlna State Referral Hospital / Zoram Medical College a tlawh a; Health secretary H Lalengmawia leh ZMC registrar Dr Jane Ralte ten lo dawngsawngin, hotu dangte nen an inkâwm.

Robert Romawia Royte chuan, Covid-19 vei enkawltute leh endiknaa chhun zan zawma thawktute inpekna leh thawhrimna a ngaihsan thu sawiin, "Mizo ṭhalai zingah Covid-19 damlo enkawl tura hlawh leh hamṭhatna beisei loa district tin aṭanga inpe nula leh tlangval tam tak an awm hian Mizo hnam a timawi a ni," a ti.

Sports minister hian ZMC-ah indoor stadium, volleyball court, basketball court leh futsal/football ground-te externally aided project aṭanga siam a nih tur thu a sawi a; ZMC tan table tennis board pahnih leh bat pali, carrom board pahnih, draught board pathum, chess board pathum, chinese checker pahnih, volleyball hmanrua, badminton racket pali leh shuttle cock bâwm pahnih a pe nghal.

SYS Minister hi MLA pahnih - Horticulture Development Board vice chairman Prof. F Lalnunmawia leh H Lalzirliana te, footballer S Malsawmtluanga, Jeje Lalpekhlua leh mi dangte'n an ṭawiawm a ni.