Genome Sequencing Laboratory-in ICMR endikna a paltlang tawh

Zoram Medical College (ZMC)-a virus chi hrang hrang hmuh chhuah leh zir chian theihna tur Genome Sequencing Laboratory bun tawh chu hmang thei turin Indian Council of Medical Research (ICMR) endikna paltlang a ni tawh a; Ministry of Science & Technology hnuaia Department of Biotechnology (DBT)-in an endik leh a la ngai.

Vanglaini palai zawhna chhanga ZMC hotute sawi danin, Genomic Sequencing Lab.-ah hian virus chi hrang hrang - Covid-19, bacteria, cancer geno­mics, HLA typing leh a dangte hmuh chhuah leh zir chian theih a ni.

Laboratory hmang tura paltlang ngai zingah ICMR an paltlang tawh a, DBT endikna an hma­chhawn leh mek. DBT an paltlang leh chuan virus hrang hrang endik nan hman theih a ni ang.

ZMC hotute chuan, sorkar laipui aṭanga Genomic Sequencing Lab. hman phalna hmu turin file hmanga chinfel ringawt a theih loh tih sawiin, "Laboratory a nih avangin sample endik tur eng emaw zat min rawn thawn ṭhin a, sample kan endikna result-te kan thawn thlâk hnuah an pawm chuan phalna kan hmu thei. Tunah hian DBT-in sample pakhat min rawn thawn tawh a, a result kan thawn thla leh tawh," an ti a, DBT-in sample an endiktir tur zat an la hriat loh thu an sawi.

Mizoram sorkar chuan Programme for Appropriate Technology in Health (PATH), Sea­ttle, USA aṭangin Geno­mic Sequencing Laboratory dinna tur US dollar 52,000 a dawng a; October 27, 2021 khan Health minister Dr R Lalthangliana'n a hawng. Genome Sequencing Laboratory hi ZMC Virus Research and Diagnostic Laboratory (VRDL) building-ah dah a ni a, India hmarchhak biala palina leh Mizorama a hmasa ber a ni.